Kampu aviasaun Naheboruk, postu Viqueque villa.

VIQUEQUE, 04 maiu 2022 (TATOLI)-Diretór Serbisu Saúde munisípiu Viqueque, Francisco de Carvalho, informa kondisaun kampu aviasaun Naheboruk, postu Viqueque villa agora daudaun aat, nune’e aviaun sei  la tun hodi evakua moras ne’ebé grave bá Ospitál Nasionál Guido Valadares (HNGV, sigla portugés). 

“Horisehik aviaun evakua moras ne’e ita obriga pilotu de’it maka aviaun mai, maibé to’o iha kampu aviasaun ne’e, pilotu dehan aviaun labele tun tan iha kampu aviasaun Naheboruk, tanba kondiasaun kampu aat. Se tun nafatin bele fó perigu ba aviaun no mós ba pasiénte sira”,  Francisco de Carvalho hateten ba jornalista Tatoli iha ninia knaar fatin, Boro Matan, kuarta ne’e.

Nia hatutan, tempu udan ne’e susar tebes ba aviaun atu tun hodi evakua moras, tanba kampu ne’e kuak barak. “Kampu aviasaun ne’e ita presiza halo re-abilitasaun no lutu, nune’e animál labele tama iha kampu aviasaun laran”, katak tan.

Durante ne’e aviaun halo evakuasaun ba moras sira ne’ebé maka presiza halo operasaun urjente, isin rua no asidente tránzitu hodi hetan salvasaun lalais iha ospitál nasionál.

“Maibé, agora kampu kondisaun aat ne’e difikulta tebes ba ita Viqueque, tanba pasiente urjente ita labele evakua ho aviaun. Ezemplu ema moras presiza halo operasaun minutu 40  tenki to’o iha Dili, maibé agora labele ona”, nia akresenta.

Ho situasaun ne’e, nia husu governu hadia fali kampu Naheboruk. “Iha 2017 ami saúde Viqueque hatama ona ba planu hodi husu orsamentu hamutuk milaun dolar amerikanu rua, maibé orsamentu la hetan aprovasaun”.

Jornalista       : Vitorino Lopes da Costa

Editora           : Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here