INS-MSTL kapasita parteira no médiku RAEOA kona-ba estandarizasaun planeamentu familiár. Imajen Tatoli/Abílio Elo Nini.

OÉ-CUSSE, 04 maiu 2022 (TATOLI) – Institutu Nasionál Sáude (INS) hamutuk ho Marie Stopes Timor-Leste (MSTL), kuarta ne’e abertura formasaun no kapasitasaun ba profisionál saúde parteira no médiku sira iha Rejiaun Administrativa Espesiál Oé-Cusse Ambeno (RAEOA) kona-ba estandarizasaun planeamentu familiár.

Formasaun ne’e hala’o durante loron-10 aplika teoria no prátika, hahú kuarta to’o sesta no alvu iha formasaun ne’e mai hosi parteira no médiku.

Diretór Formasaun INS, Reinato Soares, esplika, formasaun ne’e objetivu atu hasa’e kapasidade profisionál saúde kona-ba atendimentu hodi enkoraja komunidade sira iha área remota kona-ba iha planeamentu familiár atu moris saudável.

Tanba planeamentu familiár hanesan direitu umanu bázika ba ema idak-idak atu determina ho livre no responsabilidade, bainhira hakarak oan, no oan hirak maka sira hakarak, importante atu asegura katak planeamentu familiár ne’e inkluzivu.

Matéria prinsipál iha formasaun ne’e maka, promosaun planeamentu familiár, kona-ba prevensaun no aprende tratamentu ba pasiente sira-ne’ebé laiha jerasaun ka laiha oan.

“Iha matéria ba promosaun, tanba bainhira forma ona família presiza planeadu, kada família uma-kain, kona-ba oinsá moris saudável, tempu atu iha oan ne’e oinsá, tanba oan-sira persiza asesu edukasaun, persiza haree nia kondisaun moris, no prevene moras seksualidade,” Reinato Soares, ko’alia iha bairru Horta, Oe-Cusse.

Tuir nia, iha dadus barak akontese abortu, balu akontese kaben sedu no laiha responsabilidade, balu forma ona uma-kain maibé iha oan liuhosi na’in-10 ba leten.

Jerente Haforsa Sistema Governu iha Marie Stopes, Alexandrina Marques, hatete, atendimentu iha fasilidade saúde persiza iha koñesimentu iha planeamentu familiár nune’e bele enkoraja pasiente sira atu moris ho saudável atu asesu iha fasilidade saúde.

“Planeiamentu familiár ne’e, nu’udar pilár importante atubele kontribui ba iha redús mortalidade no komorbidade inan ho oan, tanba tuir dadus idade produtivu barak ladún asesu iha planeamentu familíar,” nia katak.

Diretóra Servisu Saúde Rejionál, Lolita Lay do Santos, agradese ba INS tanba hetan apoia hosi Marie Stopes atu realiza formasaun ne’e ba profisionál saúde, tanba tinan rua situasaun COVID-19, laiha formasaun ba profisionál sira.

Jornalista: Abílio Elo Nini
Editór: Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here