Primeiru-Ministru, Taur Matan Ruak, prezide reuniaun Konsellu Ministru. Iha Palásiu Governu, kuarta (04/05). Imajen TATOLI/Francisco Sony

DILI, 04 maiu 2022 (TATOLI)-Governu liuhosi reuniaun Konsellu-Ministru (KM), kuarta ne’e, re-apresia hodi aprova projetu Dekretu-Lei kona-ba rejime jurídiku foun aprovizionamentu nian, kontratu públiku  ho ninia infrasaun sira.

“Projetu Dekretu-Lei ne’e ho objetivu atu kria rejime jurídiku foun, klaru, simples, objetivu, rigorozu no transparente liu hodi promove dezenvolvimentu ekonómiku no sosiál país nian,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia Relevante :Rejime jurídiku aprovizionamentu foun promove dezenvolvimentu ekonómiku no sosiál

Ministru Finansa, Rui Gomes, maka aprezenta Dekretu-Lei ne’e ba iha Konsellu-Ministru.

Projetu Dekretu-Lei ida-ne’e sai ona hanesan objetu deliberasaun iha Sorumutuk Konsellu Ministru nian antes ne’e iha loron 16 fulan-marsu tinan 2022, maibé tanba iha alterasaun balun iha faze redasaun finál, presiza submete ba deliberasaun foun.

Entretantu, Dekretu-lei númeru 10/2005, 21 novermbru, kona-ba Rejime Jurídiku Aprovizionamentu, kompostu hosi artigu hamutuk 115, ne’ebé mai ho objetivu atu estabelese norma jerál realizasaun despeza akizisaun bens no servisu ka ezekusaun obra, ne’ebé destina ba nesesidade entidade administrasaun direta no indireta Estadu.

Nune’e mós, abranje prosedimentu aprovizionamentu servisu públiku ho kustu Orsamentu Jerál Estadu ka hanesan rekursu finanseiru seluk ne’ebé kontroladu ho administrasaun Estadu.

Durante ne’e iha dekretu-lei 10 ne’ebé estabelese regra aprovizionamentu inklui prosedimentu sira, hanesan dekretu-lei númeru 01/2010 kona-ba altera rejime jurídiku aprovizionamentu, dekretu-lei númeru 02/2010 kona-ba prosedimentu espesiál atu fó kontratu konstrusaun sivíl to’o montante $250.000 ba empreza ne’ebé lokaliza iha postu administrativu sira.

Nune’e mós, dekretu-lei númeru 03/2010 kona-ba akompañamentu ba prosesu aprovizionamentu ho sekretariadu tékniku aprovizionamentu, dekretu-lei númeru 01/2005 kona-ba rejime jurídiku aprovizionamentu, dekretu-lei númeru 11/2005 kona-ba infrasaun administrativa ba rejime jurídiku aprovizionamentu no rejime jurídiku kontratu públiku.

Dekretu-lei númeru 12/2009 kona-ba rejime jurídiku kontratu públiku, dekretu-lei númeru 14/2001 kona-ba medida temporária ba aprovizionamentu, dekretu-lei númeru 14/2006 alterasaun rejime jurídiku ba aprovizionamentu, dekretu-lei númeru 15/2011 estabelesementu Komisaun Nasionál ba Aprovizionamentu no alterasaun ba dekretu lei númeru 10/2005.

Dekretu-lei 2011 kona-ba Ajénsia Dezenvolvimentu Nasionál (ADN), no dekretu-lei númeru 24/2008 ne’ebé altera rejime jurídiku aprovizionamentu.

Notísia Relevante: PM konsidera presiza ajusta dekretu-lei aprovizionamentu hodi fleksibiliza rekuperasaun

Jornalista : Antónia Gusmão

Editór       : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here