Reasaun estudante ida bainhira simu vasina Pfizer COVID-19 iha Eskola São Pedro Comoro, Dili, tersa (16/11/2021). Imajen TATOLI/Antonio Gonçalves.

DILI, 04 maiu 2022 (TATOLI)– Governu liuhosi reuniaun Konsellu Ministru, kuarta ne’e, deside hodi autoriza sidadaun ho tinan 18 ba leten bele simu vasina Pfizer.

Tanba antes ne’e, vasina Pfizer autoriza de’it ba labarik ho idade 12 to’o 17, no idade liuhosi 18 autoriza simu vasina Sinovac no AstraZeneca.

Notísia Relevante :MS enkoraja estudante sira simu vasina Pfizer doze dahuluk

Ministru Prezidénsia Konsellu Ministru, Fidelis Manuel Leite Magalhães, hateten pedidu ne’e aprezenta husi Vise-Primeira-Ministra no Ministra Solidariedade Sosiál no Inkluzaun, Armanda Berta dos Santos no Ministra Saúde, Odete Maria Freitas Belo, hanesan Prezidente no Vise-Prezidente husi Komisaun Interministeriál ba Elaborasaun no Koordenasaun ba Ezekusaun Planu Vasinasaun kontra Covid-19.

“Husi alterasaun prevista, salienta katak vasina Pfizer daudaun ne’e sei administra ba sidadaun ho idade hanesan ka 18 ba leten, hanesan mós doze dahuluk no daruak, aleinde doze reforsu (booster) ne’ebé abranje ona grupu idade ne’e. Ema ne’ebé simu ona doze dahuluk husi vasina AstraZeneca ka Sinovac bele simu doze daruak vasina Pfizer”, Fidelis relata, hafoin ramata reuniaun ezekutivu, iha Palásiu Governu.

Ho nune’e, Governu nafatin apela ba sidadaun sira ne’ebé to’o ohin loron seidauk seidauk simu vasina tenke hakbesik-an ba sentru vasinasaun sira hodi simu vasina.

Enkuantu, to’o loron 2 fulan-maiu, totál 71,6% husi joven sira iha nivel nasionál entre tinan 12 no 17, pelu menus simu ona doze ida. Iha país tomak 36,9% husi joven sira simu ona doze rua. Iha Dili, 74,4% husi joven sira ho idade 12 no 17 simu ona doze rua husi vasina Pfizer.

Relasiona ho individu sira ne’ebé ho idade 18 ba leten, 72,2% simu ona pelu menus doze daruak no 84,6% simu ona pelumenus doze dahuluk husi vasina kontra Covid-19.

Notísia Relevante :Estudante 13.000 postu Viqueque Villa simu vasina Pfizer

Jornalista : Antónia Gusmão.

Editór       : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here