DNPKK disemina informasaun ba xefe suku no OPS, harii pas estabilidade iha komunidade. Imajen Tatoli/Abílio Elo Nini.

OÉ-CUSSE, 04 maiu 2022 (TATOLI) – Ministériu Interiór (MI), liuhosi Diresaun Nasionál Prevensaun Konflitu Komunitáriu (DNPKK), tersa ne’e disemina informasaun ba autoridade lokál no Ofisiál Polísia Suku (OPS), iha Rejiaun Administrativa Espesiál Oé-Cusse Ambeno (RAEOA), atu harii pás no estabilidade iha komunidade hodi kontribui ba dezenvolvimentu nasionál.

Atividade diseminasaun ne’e hala’o durante loron ida, envolve xefe suku ualu (8) hamutuk estrutura suku iha sub-rejiaun Pante Makasar no OPS na’in-18 mai hosi suku 18 iha Oé-Cusse, ho komandante esquadra haat, Oésilo Pássabe, Nítibe no Pante Makasar, ho Tema, ‘Elementu Harii Pás no Diretu Umanu, Di’akliu Prevene duke kura’.

Xefe Departamentu Administrasaun Finansa no Lojístika DNPKK, Evaristo Monis, esplika, diseminasaun ne’e bazea ba misaun no vizaun DNPKK nian hakarak komunidade hotu iha territóriu nasionál moris iha pás no estabilidade hodi kontribui ba dezenvolvimentu nasionál.

Komandante Polísia Nasionál Timor-Leste (PNTL) iha Rejiaun Administrativa Espesiál Oé-Cusse Ambeno (RAEOA), Superintendente Xefe, Mateus Mendes Assunção, diseminasaun ne’e importante ba seguransa no autoridade komunitáriu.

“Hanesan forsa seguransa, biar hotu-hotu la’o di’ak, maibé seguransa la la’o, sei fó impedimentu ba iha dezenvolvimentu tomak, ida-ne’e mak xave ba ita, ita tenke iha komitmentu di’ak oinsá harii pás no estabilidade iha komunidade nia leet,” nia katak.

Hala’o diálogu ho estudante UNPAZ

Iha loron-kuarta ne’e Diresaun Nasionál Prevensaun Konflitu Komunitáriu (DNPKK), hala’o edukasaun sívika ba estudante Universidade de Pás (UNPAS) iha Rejiaun Administrativa Espesiál Oé-Cusse Ambeno (RAEOA), atu prevene konflitu iha sosiedade no respeita direitu sidadaun.

DNPKK partilla informasaun ba estudante UNPAz prevene konflitu no respeita direitu sidadaun. Imajen Tatoli/Abílio Elo Nini.

“Tán ne’e, ami husu ba estudante sira, liuhosi edukasaun sívika ne’e, ita fahe informasaun importante, oinsá atu hatene meiu oinsá halo prevensaun, no maneira prevensaun ida mak ita halo daudaun, nune’e ita bele halo prevensaun iha ambiente eskola atu moris armónia, respeita malu,” Evaristo Monis, ko’alia iha edukasaun sívika hala’o iha Palaban Oé-Cusse

Koordenadór UNPAS RAEOA, Lorenço da Rosa, orgullu tanba bele estudante sira bele aprende matéria, siénsia no informasaun, nune’e bele prevene konflitu atu sai benefiáriu hodi transforma mentalidade, muda atitude ka hahalok estudante idak-idak nian, hodi kontribui pás estabilidade iha rejiaun ne’e.

Estudante Anastasia Jenifa Freitas dos Remedios, hosi fakuldade direitu, konsidera formasuan ne’e importante atu loke foinsa’e sira-nia hanoin oinsá hadi’a moris nu’udar jerasaun futuru nasaun nian.

Estudante Anastasia Jenifa Freitas dos Remedios. Imajen Tatoli/Abílio Elo Nini.

“Tan ne’e, ami rekomenda ba Guvernu atu kria formasaun barak ba estudante nivél hotu-hotu, nune’e bele loke ami-nia koñesimentu hodi kumpri devér nu’udar estudante ba jerasaun futuru nasaun nian,” nia katak.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here