Ekipa konjunta halo limpeza jerál hafoin ahi han kisoke 35 iha merkadu Manleuana, Dili. Imajen Tatoli/Nelia Fernandes.

DILI, 04 maiu 2022 (TATOLI)—Governu liuhosi Autoridade Munisípiu Dili (AMD) daudaun ne’e hahú halo reabilitasaun ba Merkadu Manleuana hafoin hetan inséndiu iha loron 14 fulan-fevereiru tinan 2022.

Notísia Relevante: AMD autoriza hikas vendedór 35 hala’o negósiu iha merkadu Manleuana

“Ohin, ami hahú halo reabilitasaun ba Merkadu Manleuana ne’e bazea ba faktu ne’ebé mosu akontesimentu iha loron 14 fevereiru 2022, ne’ebé hamosu inséndiu hodi fó prejuizu ba negosiante na’in-35 ne’ebé hetan perda (kerugian). Ho perda ne’e negosiante sira propoin atu hadi’a fali fatin ne’e atu sira kontinua hala’o sira-nia atividade negósiu,” Xefe Departamentu Jestaun no Merkadu, Arthur Henriques, hateten ba Agência Tatoli, iha Merkadu Manleuana, Dili, kuarta ne’e.

Governu reabilita merkadu ne’e, tanba Autoridade Munisípiu Dili (AMD) asina ona kontratu ho empreza GEZ Unipessoál, Lda, iha 28 abril 2022 hodi reabilita ba fatin ne’e.

“Nune’e, ohin prepara atu monta kuadru avizu iha ne’e, atu aban no bainrua kompañia sira komesa hala’o ona reabilitasaun,” nia dehan.

Diretór Empreza GEZ Unipesoál, Lda, Leonel Borges Pereira, hateten reabilitasaun ba Merkadu Manleuana ne’e tanba urjente, entaun Autoridade Munisípiu Dili konvida Empreza GEZ Unipesoál, Lda, halo reabilitasaun nune’e negosiante sira bele utiliza faan fali sasán.

Nia dehan, Empreza GEZ Unipesoál, Lda, asina kontratu ho Governu hahu horisehik no ohin hahú sobu ai no kalen sira-ne’ebé ahi han hodi bele halo reabilitasaun. 

Durasaun servisu tuir kontratu ne’ebé iha halo reabilitasaun to’o fulan tolu maibé hosi kompañia hakarak aselera lalais hodi ajuda negosiante sira hodi bele fila-liman.

Merkadu ne’e reabilita tuir modelu hosi Autoridade Munisípiu Dili maibé autoriza atu sobu sasán sira-ne’ebé tuan no aat ona, nune’e bele tau fali sasán foun.

Jerente Merkadu Manleuna, Julio Barros, agradese Autoridade Munisípiu Dili tanba halo ona reabilitasaun ba Merkadu Manleuana.

“Ami agradese ba Autoridade Munisípiu Dili ba reabilitasaun ne’e, maibé reabilitasaun ne’e tenke lais atu nune’e ita-nia vendedór sira bele buka moris ho hakmatek. Tanba, kuaze fulan hira nia laran, negosiante sira terus tanba la hetan rendimentu,” nia dehan.

Iha reabilitasaun ne’e, negosiante sira koopera di’ak no ohin sira hahú muda sai sira-nia sasán hodi halo negosiu iha fatin seluk ne’ebe mamuk. 

“Ita-nia negosiante sira sente kontente no koopera di’ak tebes. Ohin, ohin sira muda ona sira-nia sasán atu nune’e kompañia bele hala’o ona servisu,” nia dehan.

Entretantu, Empreza GEZ Unipessoál, Lda, asina kontratu ho Governu liuhosi Autoridade Munisípiu Dili (AMD) ho totál orsamentu rihun $23 ba durasaun fulan tolu.

Jornalista : Nelia Fernandes

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here