Ministru Administrasaun Estatál, Miguel Pereira de Carvalho. Imajen TATOLI/Francisco Sony

DILI, 04 maiu 2022 (TATOLI) –Ministru Administrasaun Estatál (MAE), Miguel Pereira de Carvalho husu ba deputadu Komisaun C Parlamentu Nasional (PN) atu aprova orsamentu millaun $7,2 ne’ebé prevee ona iha orsamentu retifikativu  hodi bele apoiu postu administrativu sira iha Territóriu nasionál Timor-Leste (TL).

“Orsamentu millaun $7,2 ne’ebé ita prevee ne’e atu entrega ba postu administrativu iha Timor-Leste laran tomak  hodi bele kontinua implementa Programa mão de obra  ne’ebe sei iha hamutuk  3.353. Programa ne’e sei halao  durante fulan neen nia laran. Kada fulan  sei fo servisu ba komunidade 100. Programa ne’e sei hahu  jullu to’o 31 dezembru 2022,” dehan Ministru Miguel Pereira iha audensia ne’ebé hala’o ho deputadu sira hosi komisaun C iha Parlamentu Nasionál, kuarta ne’e.

Notisía Relevante : Implementasaun programa mão de obra iha Covalima finaliza ona

Ministru Miguel informa ba deputadu sira katak, bainhira programa mão de obra  termina iha dezembru tinan ne’e, maka  fo ona  servisu ba komunidade hamutuk 67.59.  Programa mão de obra iha postu administrativu ne’ebé MAE propoin iha orsamentu retifikativu hamutuk millaun $7,2 ho objetivu atu hadi’a kondisaun servisu postu administrativu iha territóriu Timor laran tomak.

Membru governu ne’e haktuir katak MAE iha ona atu realiza programa hodi  fó kbiit ba administrasaun postu hodi bele atende nesesidade urjente sira iha postu administrativu nia laran. Ida ne’e ligadu ho Higenie seguransa ambientál florestál ba infrastrutura rural nomos fo kontribuisaun ba dezenvolvimentu postu administrativu ne’ebé la dun hetan atensaun hosi governu. Nomos, sei kontribui ba re-kooperasaun ekonómiku, no kontribui ba preparasaun desentralizasaun administrativa no estabelesimentu podér  lokál.

Notisía Relevante : Projetu Mão de obra iha Baucau atinje 55%

Ministru ne’e hateten tan katak, kuandu orsamentu millaun $7.2 ne’ebé Governu aprezenta ne’e maka hetan aprovasaun hosi deputadu sira, MAE sei  distribui ba postu administrativu hotu iha Timor laran tomak atu bele hala’o ona atividade ba Munisípiu sira tuir dekretu lei númeru 3/2016. Tanba iha tinan 2021, kada postu administrativu sira hetan ona alokasaun orsamentu ho total rihun $100.

“Ami sei halo distribuisaun ba postu administrativu sira atu uza hodi halo limpeza esgotu sira iha area urbana postu administrativu, limpeza no reparasaun estrada ki’ik sira iha postu administrativu, no halo limpeza ba jardín, kuda ai-horis sira iha bee ulun atu mantein kaptasaun bee, kuda ai-horis   iha fatin risku ba dezastre naturál hodi promove re-plantasaun no kuidadu situ istóriku sira,” Nia haktuir.

Maibé, Ministru ne’e hatutan tan katak, iha tinan 2022 ne’e MAE iha ona planu ba postu administrativu hotu no sei hetan orsamentu bazeia ba proposta ne’ebé prepara ona. Distribuisaun orsamentu ba postu sira ne’e ho montante la hanesan.

Ministru Miguel dehan tan katak Municípiu Aileu iha Postu administrativu  Aileu Vila, sei  hetan alokasaun rihun $115.490 no Postu administrativu Lekidoe, sei simu rihun $100. Postu administrativu  Maubisi, Municípiu Ainaro  (rihun $125), Postu administrativu Tilomár, Municípiu Covalima  (rihun $120) no Postu Administrativu Dom Aleixo, Municípiu Dili sei  hetan rihun $105.

Jornalista: Tomé Amado

Editóra    : Armandina Moniz

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here