Ema ho Defisiénsia (defisente matan), Leonito da Costa Carmone. Imajen/Espesiál.

DILI, 05 maiu 2022 (TATOLI)—Asosiasaun Defisiénsia Timor-Leste (ADTL) husu Polisia Nasional Timor-Leste (PNTL) no Polísia Nasionál Serbisu Investigasaun Kriminál (PNSIK) buka-tuir autór ne’ebé lori osan falsu sosa ema ho defisiénsia matan nia sasán.

Notísia Relevante: “Se ha’u tauk ba loron manas, sé mak atu ajuda” 

Portavós Asosiasaun Defisiénsia Timor-Leste (ADTL), Rosalia T. Pereira, esplika iha 02 maiu ne’e ema ho defisiénsia matan Leonito da Costa Carmone hala’o nia atividade negósiu hodi faan pulsa no sigaru, ema balun bosok nia lori osan falsu hodi sosa nia pulsa no sigaru iha área Fatuhada.

Ema ho Defisiénsia (defisente matan), Leonito da Costa Carmone. Imajen/Espesiál.

“Bainhira Leonito simu tiha osan tahan ne’e, nia hateten dala rua (2) tutuir malu katak keta bosok ha’u, tanba ha’u labele haree osan ne’e. Ema ne’e jura hodi dehan osan $100 ne’e ita-boot fó ha’u pulsa telefóne $6 no sigaru impotensia masu rua. Ho laran ksolok Leonito foti pulsa no sigaru lolon ba ema ne’e,” Rosalia T. Pereira, hateten ba jornalista sira liuhosi Konferénsia Imprensa iha edifisiu ADTL, Quintal Boot, Dili, kuarta ne’e.

Iha biban ne’ebá, Leonito hakat ba oin hasoru kedas Majór Falintil-Forsa Defeza Timor-Leste (F-FDTL) laran di’ak ida-ne’ebé ho intensaun atu hola pulsa, maibé iha oportunidade ne’e hatudu osan ne’e ba maun ne’e haree.

Bainhira haree tiha osan ne’e, Maijor hateten ba nia katak osan $100 ida-ne’e falsu no Majór ne’e lori nia ba hato’o keixa ba Polísia Eskudra Aimutin.

Ho aktu immoral ne’e, ema ho defisiénsia matan ne’ebé hala’o knar ba protesaun direitu ema ho defisiénsia husu ba Autoridade Seguransa PNTL no PSIK atu buka tuir autór ne’ebé komete asaun ne’e.

Alende ne’e, husu ba Autoridade Judisiáriu atu lalais halo investigasaun no kriminaliza asaun immoral ida-ne’e.

“Ami konsiente katak, asaun hanesan ne’e planeadu hosi individu no grupu ruma ne’ebé lori osan falsu hodi ba habosok ema kbiit laek ne’ebé buka sira-nia moris, liuhosi hisik sira-nia kosar-been rasik. Tanba ne’e, tenke prevene liuhosi penaliza sansaun ida forte ba autór. Se asaun ne’e mak ita la buka-tuir mak grupu ne’e sei buras liután iha ita-nia País no ema barak sei sai vítima ba asaun ida-ne’e,” nia dehan.

Husu ba públiku no entidade hotu-hotu, atu respeitu no valóriza direitu sidadaun ema ho defisiénsia matan iha país ida-ne’e.

Husu mós ba públiku atu labele mai ho hanoin karidade no kuitadu de’it, maibé tenke hanoin fó oportunidade atu sidadaun ho ema ho defisiénsia bele hola parte iha kualker atividade tuir kbiit ne’ebe ema ida-idak iha.

Husu mós ba parte kompetente, atu asegura dalan públiku sira bele asesu ho livre hosi ema la’o ain tanba dala barak trotoar okupa tiha hosi negosiante sira, entaun difikulta ba ema ho defisiénsia matan sira atu la’o mesak no livre iha dalan públiku.

Alerta mós ba públiku katak, hahalok ne’ebé ema ne’e halo hasoru ema ho defisiénsia matan ne’e aktu immorál, tanba ne’e mai hakribit hahalok aat tanba Leonito ema ne’ebé iha limitasaun boot iha nia matan ne’ebé labele haree buat ida maibé nunka tane liman hodi sustenta nia moris.

“Mai ita louva Leonito hanesan ema insipradór ida iha ita-nia sosiedade no merese atu ema hotu banati tuir nia asaun ne’e. Dala ida tan, hakarak husu ba autoridade seguransa liu-liu PNTL no PSIK atu utiliza ita-boot sira-nia profesionalizmu hodi buka tuir autór ne’e hodi hakotu hahalok mafiozu iha Timor-Leste,” nia apela.

Jornalista : Nelia Fernandes

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here