Komunidade Muslmanu selebra loron Idul Fitri iha Meskita An-Nur Kampug Alor Dili, segunda (02/05). Imajen Tatoli/Francisco Sony

DILI, 02 maiu 2022 (TATOLI)-Primeiru-Ministru, Taur Matan Ruak, segunda ne’e,  hato’o votu felisitasaun ba komunidade Musulmanu Timor-Leste tanba selebera loron Idul Fitri 1443 H, hafoin halo jejúm durante fulan loron 30 nia laran.

Koordenadór Gabinete Apoiu Sosiedade Sivil (GASC, sigla portugés), Filipe da Costa, maka  reprezenta Xefe Governu hodi hato’o felisitasaun ne’e iha Masjid An-nur, Kampo Alór, Díli.

Notísia Relevante :Selebra Idul Fitri-PR saúda komunidade musulmanu iha TL

“Nai Primeiru-Ministru hakarak hato’o ninia hakuak bo’ot, fó mós boas festa feliz idul fitri ba família Musulmanu tomak iha Timor-Leste,” nia lee iha ninia diskursu, segunda ne’e.

Governu Konstitusionál da-ualu liuhosi Gabinete Fundu Sosiedade Sivil, tau ona iha planu orsamentu anuál hodi fó apoiu  ba relijiaun hotu-hotu, atu kontribui ba dezenvolvimentu.

“Ami mós husu atu ita mantein doutrina di’ak sira ne’ebé Maromak hatu’un hosi ninia mensajeiru sira mai ita, atu sai Musulmanu di’ak ba Timor-Leste,” PM dehan.

Xefe Ezekutivu ne’e espera ba futuru, komunidade Musulmanu Timor-Leste sei sai Musulmanu ida di’ak bainhira kumpre nafatin doutrina sira. Nune’e mós sei sai sidadaun di’ak, ne’ebé atu hadomi ninia nasaun, reza ba nasaun ninia prospriedade no tulun Governu atu implementa programa sira ba dezenvolve Timor-Leste.

“Ha’u hakarak husu ba Musulmanu iha Timor-Leste atu reza ba ita-nia Nasaun, reza ba ita-nia líderansa sira, reza ba ita-nia sistema demokrasia atu nune’e ita-nia rai Timor-Leste bele iha nafatin páz, toléransia no estabilidade,” nia afirma.

Iha fatin hanesan Vise Prezidente Konsellu Nasionál Izlámika Timor-Leste, Abdula Inácio António Soares, hateten  loron 02 maiu 2022, nu’udar loron ksolok ba komunidade Musulmanu iha mundu, inklui Timor-Leste, tanba loron ne’e,  nu’udar loron vitória hafoin halo jejúm durante loron 30 nia laran.

“Durante loron 30 ami hala’o ami-nia mês de sagradu jejúm  ramadaun, nune’e ohin loron Eid Mubarak, signifika katak feliz ramadaun. Nune’e, kompara ho tinan kotuk, ita sei hasoru situasaun pandemia Covid-19 no momentu ne’ebá ami la halo buat barak, tanba ami kumpre ordem hosi ita-nia Governu,” nia dehan ba jornalista sira hafoin reza hamutuk ho komunidade Musulmanu iha Kampo-Alor Dili.

Selebrasaun loron Idul Fitri, 1443 Hijriah ne’e oinsá atu transforma mentalidade ema ida-idak atu labele ki’ak iha  intermuz moral.

“Ohin ami hamutuk halibur malu iha ne’e, hodi selebra ba loron ne’e. Nune’e, lia menon ba ha’u-nia komunidade sira oinsá atu hametin nafatin páz, dame, harmónia iha ita-nia rai doben ida ne’e,” nia hateten.

Entretantu, iha selebrasaun ne’e, Primeiru-Ministru (PM), Taur Matan Ruak,  oferese karau rua (2) ba komunidade Musulmanu iha Timor-Leste, hodi selebra loron Idul Fitri, 1443 Hijriah.

Notísia Relevante :Musulmanu fiar pilár lima to’o hakotu peregrinasaun iha mundu

Jornalista: Nelia Fernandes

 Editór       : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here