Atividade peska ilegál. Imajen/Espesiál

DILI, 03 maiu 2022 (TATOLI)-Sekretáriu Estadu Peska, Elídio de Araújo, hateten  prosesu sosa ró indústria peska hamutuk rua ba governu Timor-Leste, daudaun ne’e submete ona ba Komisaun Nasionál Aprovizionamentu (CNA,sigla portugés).

Ró ne’e ho kapasidade 250 GT ba kada ró, ho ninia orsamentu ne’ebé prevee husi MAP ba kada ró ho valór millaun $ 3.7 ne’ebé hetan aprovasaun husi Parlamentu Nasionál iha tinan 2021 liubá.

Notísia Relevante :Governu autoriza aprovizionamentu ró peska industriál kapasidade 250 GT

“Dadaun ne’e prosesu iha ona CNA, Agora koko halo kontratu ba konsultan sira para hala’o sira-nia servisu, remata ona entrega hikas ba CNA,” Sekretáriu Estadu Peska hateten ba jornalista sira hafoin halo enkontru ho Xefe Governu, Taur Matan Ruak iha Rezidénsia PM Farol, tersa ne’e.

Planu akizasaun hodi sosa ró rua ne’e ho objetivu atu kontribui ba dezenvolvimentu iha setór peska nasionál nune’e bele hasa’e kuantidade ikan.

Aleinde ne’e, bele hamenus presu ikan iha merkadu nasionál, hapara peska ilegál no asegura utilizasaun rekursu peskueiru ho forma responsável no sustentável ba futuru.

“Sei sosa iha ne’ebé ne’e seidauk hatene tanba sei liuhosi konkursu públiku, tanba daudaun ne’e sei iha hela CNA,” nia esplika.

Entretantu, antes ne’e, Sekretáriu Estadu Peska (SEP) propoin ró peska hamutuk 110 atu sosa iha tinan 2021 nia laran hodi fó apoiu ba peskadór sira iha rai-laran.

No Governu konsege sosa ró ba peskadór hamutuk unidade 38, ne’ebé destaka ba munisípiu 10, kompostu hosi Lautém tolu, Baucau neen, Manatuto ida, Same ualu, Ainaro rua, Dili sanulu, Liquiçá ida, Bobonaro hitu, enkuantu Suai no Viqueque maka seidauk distribui.

Notísia Relevante :Fulan ne’e, F-FDTL identifika ró 60 halo atividade peska ilegál

Jornalista : Antónia Gusmão.  

Editór       : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here