Komandante PNTL RAEOA, Superintendente, Mateus Assunção Mendes. Imajen Tatoli/Abílio Elo Nini.

OÉ-CUSSE, 03 maiu 2022 (TATOLI) – Komandante Polísia Nasionál Timor-Leste (PNTL) iha Rejiaun Administrativa Espesiál Oé-Cusse Ambeno (RAEOA), Superintendente Xefe, Mateus Mendes Assunção, kongratula povu Oé-Cusse tanba hatudu maturidade polítika iha períodu kampaña eleisaun prezidensiál hahú volta dahuluk to’o volta daruak situasaun la’o ho hakmatek.

“Ha’u fó parabéns ba povu Oé-Cusse tanba serbisu hamutuk komandante eskuadra sub-rejiaun haat, OPS iha suku 18, ba imi-nia esforsu tomak komesa hosi kampaña volta dahuluk mai to’o eleisaun volta daruak situasaun la’o hakmatek, ne’e tanba ita-nia preokupasaun ne’e boot mezmu buat kiik-oan mosu maibé komesa kedas hosi ita-boot sira mai to’o komandante distritál ita la fó oportunidade ba ema seluk atu halo-tuir nia kakarak tanba pás ho estabilidade ne’e ita-nia misaun,”Mateus Mendes ko’alia iha Palaban, Oé-Cusse, tersa ne’e.

Maske iha eleisaun parte seguransa enfrenta obstákulu barak, tantu iha vila no sub-rejiaun sira, akontese inséndiu balu iha suku, mai hosi ema deskoñesidu, ne’e alerta PNTL atu halo prevensaun maka’as liután.

“Ha’u kongratula povu Oé-Cusse, ninia partisipasaun iha polítika maske mai ho diferensa polítika, maibé mai ho komitmentu nafatin katak, kontribui iha estabilidade pás iha ita-nia rai Oé-Cusse, ita-boot sira nia maturidade polítika kontribui maka’as iha prosesu dezenvolvimentu,” nia kongratula.

Jestór sub-rejiaun Pante Makasar, Eurico da Costa Bobo, agradese mós ba autoridade komunitáriu sira tanba koopera ho Ofisiál Polísia Suku (OPS) garante situasaun iha suku no aldeia la’o ho hakmatek.

Entretantu, durante kampaña no eleisaun komandu PNTL rejiaun Oé-Cusse, desloka membru efeitivu atu atu asegura eleisaun prezidensiál volta dahuluk to’o volta daruak hamutuk na’in-172 komposta hosi PNTL na’in-137 no apoia hosi Polísia Unidade Fronteira (UPF) hamutuk 35.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here