Ema ho defisiénsia fízika, Bernadete Delima haktuir nia istória ho matahn bee. Imajen Tatoli/Celestina Teles.

COVALIMA, 03 maiu 2022 (TATOLI)—Hateke ba oin, ema ho defisiénsia ida tuur hakdasak no hakaas an la’o lori liman no ain dolar hodi bukia moris.

Nia liman rua ne’e kaer-toman rai hodi dada tutuir ninia ain rua ne’e, la’o ba oin ho matan hateke ba dalan ne’ebé nia atu dolar tuir bá ne’e, hodi tuur hamaluk ho família sira iha varanda ida-nia okos.

Iha uma nia tatis ne’e, avó-feto no inan-feton ida tuur hodi hein. Lahatene, dalaruma tuur hamutuk hodi konversa kona-ba sira-nia moris loro-loron nian. Dalaruma sira tuur sura loron no fulan, dadeer atu han saida, kalan ne’e sira atu fó han-hemu saida ba nia oan no bei’oan sira. 

Uma tuan be sira hamahoan an ba ne’e, harii iha suku Lalawa, aldeia Bitis, postu administrativu Tilomar, munisípiu Covalima. Iha uma ne’e nia okos bá, feto-faluk Rosalina de Jesus ne’ebé hamutuk nia oan ho nia maun ne’ebé ho kondisaun defisiénsia, sira presiza duni apoiu ai-han hodi bele kalsu netik sira kabun no hatutan moris.

Feto-faluk, Rosalina de Jesus, hela hamutuk no nia oan Bernaedete Delima ne’ebé forma ona uma-kain, laiha uma atu hela no provizóriu hela ho nia alin ikun nia uma, hodi halo toos tanba defisil atu hetan ai-han.

Feto faluk Rosalina de Jesus (tuur iha rai; liman karuk) hela hamutuk no nia oan-feto BernaRdete Delima (klaran; tur kadeira) no Bernadete nia tiun Paulos Soares (tuur hakdasak iha rai; liman kuana). Imajen Tatoli/Celestina Teles.

“Ha’u nu’udar inan, moris mai ho kondisaun difisiénsia no ha’u labele ba halo toos. Entaun ita atu han saida. Ida-ne’e mak ami-nia moris loro-loron ami enfrenta,” Feto faluk, Rosalina de Jesus haktuir ba jornalista sira iha ninia rezidénsia aldeia Bitis, foin lalais ne’e.

Oan dahuluk, Bernardete Delima haktuir istoria ho mata-been katak, maske kondisaun defisiénsia maibé loron ba loron tenke obriga-an hodi halo toos, nune’e bele hetan ai-han ruma no bele auguenta moris, atu moris ne’e sai moris liután.

“Ami ho kondisaun defisiénsia, ami tenke obriga halo toos, se lae, ami atu han saida. Ami halo toos mós ai-han la sufisiente ba ami na’in-lima. Entaun, ami tenke kalsu de’it ami-nia estómagu, han hudi hodi bele aguante moris,” Bernardete haktuir.

Antes ne’e, Bernadete Delima simu ona subsidiu invalidéz $300 hosi Governu maibé derrepente naran lakon ho lista Governu nian hodi la simu fali subsídiu ne’e.

Tanba ne’e, durante ne’e, nia rasik halo esforsu hodi konfirma nia naran iha sistema rejista nian, nia naran iha hela maibé realidade nia la simu osan to’o agora.

“Ha’u konfirma ona iha nasionál, presiza kompleta dokumentu. Maibé ha’u-nia kondisaun defisiénsia no laiha osan transporte. Entaun ha’u deside la kompleta dokumentu no la simu osan to’o ohin loron,” nia dehan.

Bernardete de Lima nia tiun, Paulos Soares, haktuir nia labele hamriik no loro-loron la’o hodi dollar de’it iha rai, nune’e nia presiza kadeira roda hodi bele tuur no lori nia la’o ba mai maibé osan laiha atu sosa.

Paulos Soares. Imajen Tatoli/Celestina Teles.

Ema ho defisiénsia, Paulos Soares durante ne’e seidauk hetan apoiu hosi Governu. To’o oras ne’e,  nia seidauk iha kartaun eleitorál to’o oras ne’e, nune’e bainhira Governu realiza eleisaun prezidensiál 2022 ne’e, nia la ezerse nia direitu votu.

“Ho ha’u-nia kondisaun defisiénsia ne’e, ha’u presiza liu mak kadeira roda tanba loro-loron ha’u dolar de’it no ha’u labele hamriik. Ha’u dolar de’it tanba ha’u-nia ain-tuur no knotak ne’e siin halo ha’u labele hamriik,” nia dehan.

Diretór Ministériu Solidariedade Sosiál no Inkluzaun (MSSI) Covalima, Agapito Assis, hateten Sentru Solidariade seidauk iha informasaun kona-ba família ema ho defisiénsia iha suku Lalawa, aldeia Bitis, postu administrativu Tilomar, munisípiu Covalima.

“Relasiona maluk difisiénsia iha postu Tilomar, foin lalais halo lavantamentu dadus, tékniku MSSI Covalima halo hotu ona liga ho problema bem-star sosiál nian, maibé ba sira na’in-tolu ne’e ita seidauk iha informasaun kona-ba sira-nia kondisaun,” nia dehan

Tanba ne’e, nia parte sei orienta ekipa tékniku iha Solidariedade Sosiál hamutuk ho autoridade lokál bele relata informasaun hodi bele relata relatóriu mai iha MSSI, tanba servisu MSSI atu fó asisténsia ba ema ho difisiénsia sira-ne’ebè MSSI servisu hamutuk ho parseiru sira.

“Ha’u hanoin programa MSSI atu fó asisténsia ba ema ho difisiénsia sira, programa ne’e ita servisu hamutuk ho parseiru sira hodi haree sira-nia kondisaun no situsaun hodi bele asesu ba asisténsia sosiál,” nia hateten.

Tuir konstituisaun RDTL, artigu 21 (Sidadaun ne’ebé iha defisiénsia), iha alínea 1 hateten sidadaun ne’ebé iha defisiénsia fíziku eh mentál iha direitu no mós obrigasaun hanesan sidadaun sira seluk, maibé sira sei la hala’o knar hirak ne’ebé sira labele hala’o tanba de’it sira-nia defisiénsia.

Iha alínea 2 haktuir, Estadu, wainhira bele, promove protesaun ba sidadaun sira-ne’ebé iha defisiénsia, tuir lei haruka.

Jornalista : Celestina Teles

Editor       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here