Imajen espesiál

DILI, 03 maiu 2022 (TATOLI) – Ministériu Turizmu Komérsiu no Indústria (MTKI) liuhosi Diresaun Jerál Turizmu asina akordu ho parseiru servisu hanesan Asia Foundation, Estatístika Nasionál, Diresaun Nasionál Imigrasaun, atu halo survey ba vizitór sira hosi estranjeiru mai Timor-Leste.

Ministru MTKI, José Lucas do Carmo, hateten objetivu hosi akordu ne’e atu servisu hamutuk entre intituisaun sira, hodi haree ba baze dadus visitante estranjeiru sira ne’ebé mak mai vizita Timor-Leste.

“Akordu ne’e oinsá ita-nia instituisaun sira ne’e servisu hamutuk hodi halo survey ba ita-nia visitór sira hosi estranjeiru mai ita-nia rai, presiza koordenasaun ne’ebé mak di’ak entre instituisaun sira, atu bele eleva dadus ne’ebé mak ho kualidade”, José Lucas do Carmo, hateten liuhosi komunikadu ne’ebé Agência Tatoli asesu tersa.

Membru Governu ne’e apela ba instituisaun relevante ne’ebé ohin asina ona akordu ho parte hotu atu servisu hamutuk, nune´e bele prodús dadus ne’ebé mak kualidade ho objetivu atu bele dezena no dezenvolve setór turizmu ho di´ak liutan.

Diretór Diresaun Jerál Imigrasaun, Luis Barreto, hateten ho akordu ne’ebé ohin realize ho parte imigrasaun, ba oin sei fornese dadus ba MTKI liuliu vizitante sira ne’ebé mak mai iha Timor-Leste.

“Tanba asina akordu ne’e sei fortifika liutan dadus iha Timor-Leste, nune’e bele kontrola no bele dezenvolve di’ak liutan setór turizmu ne’ebé ho kualidade”, konklui.

Jornalista : Arminda Fonseca

Editór : Zezito Silva.

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here