Motorista Ojek, Laurentino Amaral. Imajen Tatoli/Celestina Teles.

COVALIMA, 03 maiu 2022 (TATOLI)—Motorista motor ojek ne’ebé loro-loron hala’o atividae tula pasajeiru ba-mai, sente triste ho presu nesesidade bázika no kombustível ne’ebé sa’e tanba redimentu ne’ebé nia hetan liuhosi atividade ojek la sufisiente atu sustenta nesesidade família uma laran.

 “Ha’u hetan osan liuhosi atividade ojek, osan ne’ebé ami hetan la sufisiente uza ba nesesidade loro-loron nian tanba nesesidade bázika no kombustível mós folin sa’e,” Motorista Ojek, Laurentino Amarál, hateten ba jonalista sira iha merkadu Covalima, tersa ne’e.

Tuir nia, loron ida hetan osan $11,00 liuhosi atividade ojek maibé kompara ho presu nesidade bázika no kombustível Aqua boot ida ho nia presu $2.50 cent la sufisiente uza ba nesesidade uma laran nian.

Antes ne’e, prezu kombustível iha Covalima agua bo’ot ida ho nia presu $ 1,25 maibé agora sa’e ona ba $2,50, sira bele sustenta familia maibé agora ne’e defisil tebes entaun Governu tenke buka lalais solusaun.

“Ami ojek iha vila laran no selu de’it sentavus 0,50, ho nune’e loron ida ami hetan de’it rendimentu $11,00 no hosi ne’e ami fila ba uma lori de’it $4,00 tanba sei ense gazolina,” nia hateten.

Motorista Lucio da Conceicão hateten, sidadaun ne’ebé buka osan liuhosi atividade ojek iha Covalima ho sira-nia redimentu loro-loron la sufisiente atu uza ba nesesidade.

“Ami dehan la sufisiente tanba ami ojek de’it iha vila ne’ebé selu de’it sentavus 0.50, entaun loron-ida ami balun hetan de’it $10,00 balun mak $11,00,” nia hateten.

Ho redimentu ne’ebé mak iha kompara ho presu nesesidade bázika no kombustível aasliu redimentu ne’ebé sira hetan entaun osan la sufisiente uza ba nesesidade.

Antes ne’e, iha loron 25 fulan abril 2022, Governu liuhosi Ministériu Petróleu no Minerál (MPM) hamutuk ho Autoridade Nasionál Petróleu no Minerál, koordena mekanizmu implementasaun subsídiu kombustível ba oporadór transporte rodoviáriu, aereu no marrítima, inklui operadór postu kombustível 59 ne’ebé iha lisensa.

Kestaun ne’e liga ho dekretu-lei númeru 18/2022 kona-ba atribuisaun subsídiu kombustível ba operadór transporte rodoviáriu públiku, transporte aéreu no marrítimu nasionál, inklui adkirente kombustível destinadu ba atividade agríkola no piskatória, ne’ebé tempu badak Governu sei implementa.

Bazeia ba peskiza ne’ebé ANPM halo, folin gazolina normál $1,08 maibé daudaun sa’e ba $1,35, ho nune’e mekanizmu fahe subsídiu kombustível mak kada benefisiáriu lori voucher ba estasaun kombustível no tuir selu presu normál $1,08, enkuantu restu Governu mak selu hanesan subsídiu.

Jornalista : Celestina Teles

Editór       : Cancio Ximenes.

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here