Enkarregadu Negosiu Embaixada EUA iha Timor-Leste, Tom Daley, entrega ekipamentu treinu nian ba Vise-Ministru Interiór, António Armindo hodi kapasita membru PNTL sira relasiona ho esploisaun bomba nian, iha resintu UEP, tersa (03/05). Imajen Tatoli/Francisco Sony

DILI, 03 maio 2022 (TATOLI)— Membru Polísia Nasionál Timor-Leste (PNTL), liuhosi Sesaun Explosive Ordinance Disposal, Unidade Espesiál Polísia (EOD-UEP), na’in-neen tuir formasaun kona-ba halo destroisaun ba materiál funu mundiál daruak.

Formasaun ba ekipa Explosive Ordnance Disposal (EOD) na’in-neen ne’e oferese hosi Forsa Marína Estadu Unidu Amérika (EUA) liuhosi programa Humanitarian Mine Action Program (HMATP), durante loron 15.

Notísia relevante: EOD-UEP Destrui Materiál Explozivu 50-Resin

Ekipa EOD ne’e rasik nu’udar seksaun ida hosi  Unidade Espesiál Polisia (UEP) nian, ne’ebé estabelese iha 2011 ho nia funsaun atu fó atendimentu ba kestaun seguransa ezklusivu liuliu destrui materiál funu segunda mundiál nian ne’ebé konsidera sei ativu.  

Komandante UEP Superientendente Xefe, Orlando Gomes. Imajen TATOLI/Francisco Sony

“Ita hotu hatene iha Timor Leste sei iha restu materiál funu segunda mundiál nian no iha tempu Indonézia nian ne’ebé mak abandona hela iha territóriu nasionál Timor-Leste. Se karik ida ne’e ita la atende, bainhira rebenta arbiru mak bele hamosu perigu bo’ot ba populasaun Timor-Leste,” Komandante Unidade Espesiál Polisia (UEP), Superintendente Polisia, Orlando Gomes, hateten iha edifisiu UEP, Bairru-Pité, tersa ne’e.

Tanba ne’e, Komandante ne’e dehan presiza duni membru sira hetan kapasitasaun iha área tékniku no tátiku polisiál bele apoia no garantia susesu misaun PNTL nia hodi fó seguransa ba ema hotu iha Timor-Leste nian.

Nune’e, Komandu UEP husu membru EOD-UEP na’in-neen ne’ebé tuir formasaun tenke ho sériu hodi bele domina tékniku no tátiku atubele halo exploisaun ba materiál funu ne’ebé sei ativu.

UEP agradese ba Embaixadór Estadu Unidu iha Timor-Leste (EUA) tanba ho kooperasaun Komandu Jerál PNTL hodi oferese formasaun ba membru EOD atu aumenta sira nia kapasidade no koñesimentu.

Komandante Jerál PNTL, Komisáriu Faustino da Costa. Imajen TATOLI/Francisco Sony

Iha biban hanesan, Komadante Jerál PNTL, Faustino da Costa, hateten  formasaun ne’e hosi HMATP ba ekipa EOD atu tau matan ba materiál funu hahú hosi funu mundiál daruak no tempu Indonézia nian, nune’e ekipa EOD bele buka tuir atu  halo destroisaun hodi labele fó impaktu ba ema nia vida

“Ita halo abertura ba formasaun Humanitarian Mine Action Program (HMATP) hodi membru EOD oinsá sira bele proteje di’ak liu ita nian komunidade liuhosi materiál funu ne’ebé maka balun sei ativu hela,” dehan Nia.

Vise Ministru Interiór António Armindo, husu ba membru EOD atu aproveita oportunidade formasaun ida ne’e ho mazimu, nune’e ba oin halo kna’ar di’ak liutan ba kestaun seguransa ezklusivu.

“Ha’u agradese ba Emabaixadór Estadu Unidu Amérika iha Timor-Leste, liu hosi esforsu bele realiza formasaun ne’e no husu atu formasaun Humanitarian Mine Action Progrma      bele kontinua nafatin iha futuru,” Governante ne’e sujere.

Entretantu, Enkarregadu Negosiu Embaixadór EUA iha Timor-Leste, Tom Daley, mós afirma formasaun Humanitarian Mine Action Progrma ba membru PNTL ida ne’e nu’udar afirmasaun EUA hodi hamentin kooperasaun ho Governu Timor-Leste iha área seguransa.

“Ha’u espera ho kooperasaun Humanitarian Mine Action Program hametin lasu amizade entre Govevernu EUA no Governu Timor-Leste iha asuntu seguransa, ami mós kompromete sei kontinua hametin  kooperasaun sira iha área sira seluk,” Emabixadór ne’e kompromete.

Material ne’ebé komunidade hetan, maioria identifikadu mai hosi tempu funu mundiál II, no funu tempu 1974 to’o 1975 nian.

Durante tinan 2020, ekipa EOD-UEP, halo ona destroisaun ba material eskluzivu hamutuk 50-resin iha territóriu Timor-Leste.

Notísia relevante: EOD-UEP destroi material esplozivu iha Ermera

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here