Diretór servisu edukasaun munisipál Viqueque, Emidio Amaral. Imajen TATOLI/Vitorino Lopes

VIQUEQUE, 3 maiu 2022 (TATOLI)–Diretór servisu edukasaun munisipál Viqueque, Emidio Amaral, informa kondisaun estrada liga bá suku Uaibobo, postu administrativu Ossu difikulta prosesu transportasaun materiál konstrusaun ba Eskola Bázika Filiál (EBF) Uaibobo.

“Projetu komunitáriu ne’e 17 maka implementa ona, maibé hela EBF Uaibobo maka seidauk implementa tanba kondisaun dalan, ami iha dalan alternativu ida hodi orienta grupu responsavel ba  konstrusaun atu mai foti osan hodi implementa iha fulan-maiu ne’e”, nia katak ba jornalista TATOLI iha administrasaun munisípiu Beloi, tersa ne’e.

Diretór edukasaun ne’e haktuir hosi projetu 18, falta ida mak seidauk implementa, konstrusaun sala tolu iha EBF Uaibobo ho montante orsamentu $116.976,18.

Nia dehan konstrusaun Eskola Bázika Sentrál Kabira-oan agora daudaun atinje ona pursentu 75 no konstrusaun pre-eskolár Uaibua, postu administrativu Ossu sei inaugura iha loron 26 fulan-ne’e.

konstrusaun projetu komunitáriu iha postu Uatulari ba EBF Nahae foin hahú, rai henek tula iha Vemase, Baukau.

“Projetu komunitáriu ba eskola 18 ne’ebé  hahú implementa iha fulan-fevereiru 2022 ho durasaun fulan neen, bele estende, maibé labele liu tinan rua”, esplika.

Tuir dokumentu livru 3B Orsamentu Jerál Estadu (OJE) 2022 aprovadu, ne’ebé ko’alia konaba alokasaun ba munisípiu sira haktuir, área edukasaun iha munisípiu Viqueque deskreve profesór ba ensinu infantil públiku hamutuk 35, fundasaun hitu, profesór ensinu báziku públiku 745, privadu 82. Profesór ba ensinu sekundáriu públiku 110, privadu 40, ensinu tékniku sekundáriu públiku 18.

Fasilidade edukasaun iha administrasaun munisipál Viqueque mak eskola infantil públiku 25, privadu rua no fundasaun haat, eskola ensinu báziku públiku 91 no privadu hitu. Eskola ensinu sekundáriu públiku neen no privadu tolu, eskola ensinu sekundáriu tékniku públiku ida.

Notísia relevante: Eskola lima Viqueque seidauk implementa projetu komunitáriu tanba kondisaun estrada 

Jornalista       : Vitorino Lopes da Costa

Editora           : Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here