Jornalista sira bainhira halo kobertura iha ámbitu luta kontra COVID-19. Imajen TATOLI/Egas Cristóvão.

DILI, 03 maiu 2022 (TATOLI)—Prezidente Konsellu Imprensa (CI), Virgílio da Silva Guterres, hateten CI sei hasai karteira profisionál hanesan sansaun ida ba jornalista bainhira identifika kontra regra balun ne’ebé mak mensiona iha kódigu étiku jornalístika nian.

“CI avalia iha mídia balun ne’ebé mak kontra kode étika jornalístiku, maibé CI sei observa no análiza kontra ne’ebé mak ita-nia jornalista sira halo. Sansaun mak CI sei foti fila-fali karteira profisionál hosi jornalista sira,” Prezidente CI hateten ba jornalista sira, bainhira partisipa iha komemorasaun loron mundiál liberdade imprensa, iha Delta Nova, Coromo, Dili, tersa ne’e.

Violasaun hirak-ne’e akontese tanba jornalista fó sai informsaun ne’ebé mak la ekilibriu, no la konfirma fila-fali ho fonte informasaun, entaun notísia ne’e provoka hodi kontribui mós ba situasaun sensasionál ba estabilidade nasaun ne’e nian.

Maibé, nia dehan, to’o agora CI seidauk bele deside atu hasai kartaun profísionál hosi jornalista sira maibé bainhira hasai ne’e siginifika jornalista refere halo violasaun grave hasoru kode étiku jornalístika.

Durante iha eleisaun prezidensiál primeira no segunda volta ne’e, mosu violasaun entaun CI sei halo prosesu no nia konkluzaun ikus mak sei fó sai nia rezultadu, maibé CI seidauk bele temi jornalista no mídia nia naran.

Nia dehan, deklarasaun ida-ne’e deklara iha konferénsia imprensa ne’ebé realiza hosi CI iha loron 25 marsu 2022.

Entretantu Konsilleiru CI, Expedito Dias Ximenes, hateten sei kontrola redasaun sira atu nune’e konvense nafatin jornalista sira hodi kontinua kumpre kódigu étika jornalístika  no lei komunikasaun sosiál ne’ebé iha.

Rezultadu ne’ebé mak CI análiza no observa mak hanesan tuir mai ne’e:

  1. Kobertura no publikasaun notísia, programa, live streaming hosi mídia durante atividade kampaña no sira fó sai de’it mak kandaditu boot sira.
  2. Durante atividade kampaña, CI mós identifika jornalisa ka mídia sira halo notísia ne’ebé provokativu no sensasionál hodi la kontribui ba estabilidade no pás ba rai ida-ne’e, tanba nakonu de’it ho opiniaun jornalista no editór sira-nian.
  3. CI mós identifika iha notísia balun ne’ebé mak la sensivel ba jéneru iha nia kobertura ba publiksaun liga ho loron votasaun nian.
  4. CI mós identifika jornalista balun halo promosaun kandidatu Prezidente Repúblika balun nia foto liuhosi mensajen ne’ebé mak suporta kandidatu iha nia akun mídia sosiál (Facebook).

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here