DILI, 03 maiu 2022 (TATOLI)— Governu liuhosi Komisaun Interminsiteriál Vasinasaun Kontra COVID-19, tersa ne’e, hala’o enkontru hodi diskute estratéjia kona-bá hasa’e taxa partisipasaun sidadaun nian iha programa imunizasaun kontra COVID-19 iha territóriu Timor-Leste.
“Ami halao enkontru ida ne’e hodi tau ideia hamutuk ba munisípiu balun ne’ebé mak taxa vasina sei menus atu haree hamutuk, hodi hasa’e taxa kobertura vasinasaun ba munisípiu sira ne’ebé seidauk atinje 80%,” Minsitra Saúde, Odete Maria Freitas Bel, hateten ba jornalista sira bainhira ramata enkontru iha salaun MSSI, Caicoli, tersa ne’e.
Primeiru Ministru, Taur Matan Ruak husu atu Komisaun Interministeriál Vasinasaun Kontra COVID-19 atu esforsu hasa’e taxa partisipasaun sidaudaun nian too atinje 80% iha territóriu nasionál ho doze kompletu.
Alende ne’e, Organizasaun Mundiál Saúde mós husu atu hasa’e taxa partisipa atinje 70% too 80% iha territóriu nasionál.
“Ita timór-oam balun lakohi vasina entaun ida ne’e mak situasaun ne’ebé mak iha no estoke vasina ita sufisiente hela.Tanba daudaun ne’e vasina doze dahuluk iha territóriu nasionál atinje ona 84,6% no doze darauk mantein 72,2%. Nune’e ita presiza tan persentajem oituan hodi kompleta 80%,” Governante ne’e afirma.
Nune’e, Governu enkoraja ba komunidade sira atu hakbesik ba fasilidade saúde ne’ebé mak besik hodi simu vasina doze dahuluk no daruak hodi hasae imunidade hodi kontra COVID-19 iha Timor Leste.
“Ami husu ba lider komuniatriu sira, liña ministeriál no mídia sira kontinua fahe informasaun ba komunidade sira atubele partisipa simu vasina doze dahuluk no daruak hodi kontra surtu COVID-19 iha ita-nia rain,” nia rekomenda.
Alende ne’e, Governante ne’e dehan garante protesaun saúde ba konvidadu hosi estranjeiru ne’ebé atu partisipa komemorasaun loron restaurasaun indepedensia dala-20 tanba Timor Leste kompleta ona vasinasaun kontra COVID-19.
“Ita-nia vasina doze dahuluk iha territóriu nasionál ita atinje ona 84,6% no doze daruak 72,2% hodi bele proteje konvidadu espesiál sira hosi nasaun estranjeiru atu mai partispante loron restaurasaun indepedensia dala-20 iha ita-nia rain,” Minsitra Saúde afirma.
Governu prepara ona ekipamentu ka lojistika iha setór saúde atu simu konvidadu espesiál sira ne’ebé atu mai partisipa loron importante refere.
“Ita implementa ida ne’e tanba ita mós dalabarak ba ema nia-rain ema husu kartaun vasina, nune’e kritéira ida ne’e mak ita sei aplika fila-fali ba bainaka sira ne’ebé mak mai iha ita-nia rain,” nia afirma.
Daudaun munisípiu Ermera ho Bobonaro mak persentajen vasinasaun ki’ik hanesan Ermera doze dahuluk 72,7% no doze daruak 57,2%, Bobonaro mak doze dahuluk 82,3% no daruak 59,2%.
Enkuantu iha munisípiu Dili populasaun ne’ebé hetan vasina ona doze dahuluk 86,6%, daruak 81,5%, Covalima doze dahuluk 95,8% no daruak 78,0%,Viqueque doze dahuluk,94,8% no daruak, 83,9%, Manufahi doze dahuluk 86,8% no daruak, 71,3%, Manatuto doze dahuluk 86,1% no daruak 66,7%, Baucau doze dahuluk, 85,7% no daruak 72,7%, RAEOA doze dahuluk, 85,0% no daruak 75,3%, Ainaro doze dahuluk 82,2% no daruak 85,4%, Lautem doze dahuluk 81,1% no daruak 67,7% , Aileu doze dahuluk 81,1% no daruak 67,9% no Ermera doze dahuluk 72,7% no daruak 57,2%.
Notísia relevante: COVID-19: kazu pozitivu na’in-ida, rekuperadu hitu no ativu 15
Jornalista : Felicidade Ximenes
Editór : Florencio Miranda Ximenes
