Seremónia isár bandeira iha Munisípiu Covalima, Imajen Tatoli/Dok

COVALIMA, 03 maiu 2022 (TATOLI)—Administradór Postu Administrativu Fatumea, Geraldo Orleans informa, atu komemora loron restaurasaun independénsia ba dala-XX (20 maiu 2002-20 maiu 2022), postu administrativu Fatumea sei la realiza atividade animasaun hodi anima komunidade tanba kestaun orsamentu la sufisiente.

Notísia Relevante: Covalima sei komemora restaurasaun independénsia ho desportu komunitária

“Kona-ba preparasaun atu komemora loron restaurasaun independénsia Timor-Leste 20 Maiu 2022, ha’u observa ona fatin no ami halo ona preparasaun 50% maibé sei la realiza atividade animasaun ba komunidade tanba kestaun orsamentu,” Geraldo Orleans hateten ba Agência Tatoli, iha resintu BNU Covalima, tersa ne’e.

Atu komemora loron restaurasaun independénsia iha postu administrativu Fatumea la realiza atividade sira hanesan atividade kulturál no desportu tanba haree ba orsamentu la sufisiente.

“Kona-ba atividade desportu no atividade kulturál haree hosi orsamentu ami la prepara duni maibé ami prepara atividade ba korpu isár bandeira  no grupu koru atu hananu Hino Nasionál “Patria! Patria!” ba loron restaurasaun independénsia nian,” nia dehan.

Kona-ba orsamentu, nia informa, bazea ba reuniaun ho administrasaun munisipál Covalima orsamentu prevee hanesan uluk ho totál hamutuk $750,00, nune’e orsamentu ne’e prepara ba isár bandeira no koru ba Hino Nasionál.

Antes ne’e, iha 25 abril 2022, Prezidente Komisaun Oganizadóra Francisco de Jesus Alves hateten, atu komemora loron independénsia ba dala-XX ne’e, Covalima sei realiza atividade desportu komunitáriu no bazar kalan maibé ho mós atividade sira seluk tan ne’ebé divizaun seidauk bele fó sai tanba foin mak atu aprezenta.

Jornalista : Celestina Teles

Editór      : Cancio Ximenes.

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here