Diretór EBC Númeru I Lolotoe, munisípiu Bobonaro, Matias da Costa. Imajen Tatoli/Sérgio da Cruz.

BOBONARO, 03 maiu 2022 (TATOLI) – Ensinu Bázika Sentrál (EBC, sigla portugues) númeru I Lolotoe, postu administrativu Lolotoe, munisípiu Bobonaro, durante ne’e enfrenta hela difikuldade kona-bá menus livru matéria  tolu ne’ebé ligadu liu ba ezame nasionál.

Diretór EBC númeru I Lolotoe, Matias da Costa, esplika dezde estabelesimentu eskola ne’e matéria kada disiplina kompletu, maibé númeru estudante aumenta inklui sala aula livru hirak-ne’e la sufiesiente atu distribui.

“Ami-nia problema mak hanesan menus matéria didátiku, depois menus livru língua Tetun, Portugés no Matemátika, maibé durante ne’e profesór sira sempre uza troka malu livru sira-ne’ebé iha mas la sufisiente,” nia informa ba Agência Tatoli, iha Kámara Dioseze Maliana tuan, suku lahomea, postu administrativu Maliana, tersa ne’e.

Nune’e mós problema ida tán mak menus kadeira no meza, tanba dezde 2012 Ministeriu Edukasaun, Juventude no Desportu (MEJD) apoia kartera 100 to’o agora sei utiliza inklui kadeira balu dezde tempu Indonézia nian, maibé daudaun ne’e balun kondisaun ladi’ak no la sufisiente ona atu estudante sira tuir prosesu aprendizajen.

Matias hakatuir, problema hirak-ne’e parte eskola levanta ona ba servisu edukasaun munisípiu Bobonaro atu enkamiña ba nasionál, maibé to’o agora seidauk hetan resposta hosi ezekutivu sira tanba ne’e husu ba MEJD atu aselera pedidu sira-ne’e.

“Maske problema sira-ne’e iha ami nu’udar servidór estadu nian, ami kotinua kumpre devér hodi fó edukasaun ba ita-nia oan sira, atu prepara sira-nia futuru hodi lidera ita-nia nasaun iha future,” nia akresenta.

Totál estudante iha EBC númeru I Lolotoe  komposta hosi sétimu to’o nonu-anu hamutuk 203 akumula sala aula sia, enkuantu totál profesór permanente no kontratadu na’in-19.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here