Ilustrasun Dijitalizasaun. Imajen/Espesiál.

DILI, 03 maiu 2022 (TATOLI)—Consultant CI Unit-Organizasaun Siénsia Edukasaun no kultura (UNESCO) iha Jakarta, Hesthi Murthi, hateten ameasa dijitalizasaun iha mídia sosiál la’ós fó ameasa ba jornalista de’it maibé fó ameasa mós ba públiku ne’ebé asesu informasaun loro-loron.

Notísia Relevante: Virgílio Guterres: “Kombate ameasa dijitalizasaun presiza halo literásia dijitál”

“Mudansa dezenvolvimentu dijitál hamosu ameasa la’ós ba jornalista sira iha mídia maibé mós ameasa ba públiku ne’ebé asesu ba informasaun iha mídia sosiál,” konsultan ne’e hateten liuhosi virtuál, bainhira akompaña diskusaun iha komemorasaun loron mundiál Liberdade imprensa liuhosi semináriu ho tema “Jornalizmu iha Ameasa Dijitalizasaun” ne’ebé hala’o iha salaun Delta Nova, Dili, tersa ne’e.

Tanba, tuir dadus 2021 to’o 2022 ne’ebé UNESCO divulga ne’e ho forma ne’ebé diversu no preokupa tebes bainhira mosu vijilánsia ba jornalista sira.

Xefe Departamentu Komunikasaun sosiál iha Universidade Nasionál Timor-Leste (UNTL), Dulce da Silva Martins, hateten atu kombate ameasa jornalismu iha área dijitalizasaun presiza kombate liuhosi fó formasaun no mellora kualidade jornalista liuhosi dezempeñu servisu loro-loron nian.

“Atu evita ameasa iha era dijitaliazasaun entaun presiza mellora kualidade jornalista ninian liuhosi dezempeñu servisu. Tanba kualidade ne’e importante, nune’e presiza fó formasaun ba jornalista sira atu bele aumenta sira-nia koñesimentu,” nia dehan.

Xefe Komunikasaun Sosiál ne’e hateten, atu utiliza dijitalizasaun sai hanesan métodu formasaun ida-ne’ebé hodi bele kontrola informasaun ho kualidade no di’ak liután.

CEO STL Mídia, Salvador Soares, hateten iha era dijitalizasaun ne’e mós fó ameasa ba distribuisaun jornál, tanba mídia sosiál hanesan sai referénsia ba públiku.

“Tanba ne’e, ita tenke muda ita-nia perspetiva tempu uluk no tempu agora nian. Tanba uluk ne’e velosidade tau importánsia maibé agora velosidade la’ós sai fator primeiru,” nia dehan.

Tuir nia, atu hasa’e kualker jornalista sira-nia abilidade mak jornalista sira tenke sai multijournalism ne’ebé bele hatane hakerek iha mídia emprime hanesan jornál, mídia eletrónika hanesan rádiu-televizaun no mídia online.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here