Diretór Servisu Edukasaun Munisípiu Bobonaro Crispim Moniz. Imajen Tatoli/Sérgio da Cruz.

BOBONARO, 03 maiu 2022 (TATOLI) –  Servisu Edukasaun Munisípiu Bobonaro koordena ho parte finansa autoridade munisipál, tersa ne’e realiza enkontru ho dirijente eskola públiku sira hodi disemina prosedimentu foun kona-ba implementasaun no ezekusaun orsamentu ba programa merenda eskolár ne’ebé sei hahú iha fulan ne’e.

Diretór Servisu Edukasaun Munisipál Bobonaro, Crispim Moniz, hateten atividade ne’e realiza ligadu ho enkontru nasionál ne’ebé realiza iha loron 04 fulan-marsu, hosi parte kompetente orienta servisu edukasaun munisípiu hotu atu esklarese manuál foun ba implementasaun programa ne’e, nune’e bainhira hahú bele ezekuta orsamentu tuir ninia prosedimentu legál sira.

“Ohin, ami mai disemina manuál foun ne’e ba dirijente eskola sira, maibé programa ne’e ita sei realiza fali iha fulan-maiu ne’e antes estudante sira hahú prosesu aprendizajen segundu períodu,” nia ko’alia Kámara Dioseze Maliana tuan, suku Lahomea, postu administrativu Maliana.

Orsamentu ba programa ne’e sei refere transfere ona ba konta bankária kada ensinu bázika sira tuir aprovasaun orsamentu ne’ebé aloka ba munisípiu Bobonaro ho durasaun loron-100 efetivu ho menu ai-han produtu lokál.

Purtantu parte edukasaun Bobonaro identifika no rejista preokupasaun hosi dirijente eskola sira kona-ba fasilidade hanesan dapur, ekipamentu te’in tanba ne’e husu atubele implementa programa refere tuir kondisaun eskola idak-idak nian.

Diretór Ajénsia Fiskalizasaun Autoridade Munisipiu Bobonaro, Egidio Loi-Siga, apela ba dirijente eskola sira bainhira programa ne’e reativa tenke kontrola fornesedor sira ba implementasaun programa refere nune’e estudante sira bele goza direitu loron ida sentavu  0,25 tuir matadalan ne’ebé estabelese ona.

Nia parte hamutuk ho ekipa sei tún direita iha terrenu hodi halo fiskalizasaun ba implementasaun programa ne’e tuir matadalan ne’e ka lae. Nune’e mós atu fiskaliza mós menu ai-haan ne’ebé fornesedór sira oferese kada loron tenke ijiene no nutritivu bazea ba rekomendasaun hosi parte saúde tanba matadalan ba programa iha tinan ne’e hahú promóve ona produtu lokál.

Tótal orsamentu ba programa merenda eskolar tinan 2022 iha autoridade munisipál Bobonaro ba liuhosi transferénsia públika hamutuk $ 980,000,00.

Enkuantu totál eskola iha munisípiu Bobonaro  ne’ebé sai benefisiáriu hamutuk 158, kompostu hosi sentru ensinu bázika 23, eskola bázika sentrál 23 no eskola bázika filiál 112.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here