Ekipa sanemaentu munisípiu Dili kontinua raut hela lixu ne’ebé komunidade sira soe iha estrada ibun área Comoro, tersa (18/01/2022). Imajen Tatoli/Antonio “Dasiparu” Gonçalves.

DILI, 29 abril 2022 (TATOLI)—Estudante Universidade Nasionál Timor-Lorosa’e (UNTL), Fakuldade Siénsia Sociáis, Departamentu Dezenvolvimentu Komunitária, José Moniz António da Costa, hateten iha selebrasaun loron restaurasaun independénsia ba dala-XX ne’e presiza ema hotu nia kontribusaun hodi hamoos Dili sai furak no bonita.

Notísia Relevante: Autoridade Munisípiu Dili muda ona negosiante 300-resin iha estrada protokolu Tasi-Tolu

“Ita-nia selebrasaun 20 maiu besik ona, haree ba ita-nia sidade díli agora dadaun foer barak tanba ita-nia maluk sira so’e lixu la tuir nia fatin ne’ebé Governu prepara ona. Se ita hakarak sidade Dili ne’e moos ita tenke so’e foer iha nia fatin, atu nune’e ita haree sidade Dili ne’e moos no saudável, aleinde ne’e ne’e bele dada mós ita-nia vizitante sira mai,” José Moniz António da Costa, hateten ba Agfência Tatoli, iha Jardin Motáel, Dili, sesta ne’e.

Sidade Dili sai foer tanba bainhira sidadun sira konsumu bee no hahan sira iha plástiku ruma ne’e, han hotu hodi soe foer arbiru de’it iha fatin-fatin maibé la kontrbui soefoer ba lixu fatin ne’ebé Governu prepara ona.

“Ita haree sidade Dili foer barak, bainhira ita la kuidadu ita-nia ambiente sei fó impaktu ba ita-nia an rasik mak hanesan mosu inundasaun. Tanba ne’e, ita presiza kuidadu ita-nia ambiente, liu-liu kapitál Dili, nune’e bele sai moos no kapitál ne’ebé bonita iha bainaka espesiál sira-ne’ebé Govenu no Estadu konvida atu partisipa serimónia toma pose ba PR eleitu,” nia dehan.

Nune’e mós Julio Soares Belo heteten, hanesan sidadaun ida haree kapitál Dili foer ne’e Governu liu-liu parte saneamentu dministrasaun Munisípiu Dili tenke tau matan hodi hamoos lixu tanba loron boot 20 maiu besik ona.

“Agora ita la’o iha fatin-fatin haree sidade Dili fo’er barak loos. Ha’u sente ne’e ladún di’ak. Ita ukun an ona presiza sidade ne’ebé moos. Tanba iha loron 20 maiu ne’e, ita-nia konvidadu sira mós mai barak, nune’e ha’u husu Governu tau matan netik hodi hamoos foer sira-ne’e, nune’e ita haree ba ita-nia sidade ne’e furak,” nia hateten.

Estudante Universidade Díli (UNDIL), Fakuldade Siénsia Saúde, Departamentu Enfarmajen Dentária, Terezinha de Jesus, hateten hanesan estudante haree ba sidade Dili ne’ebé fo’er ladún furak, liu-liu iha jardin Motáel, Largo Lecidere no Cristo Rei, agora daudaun foer no ema la hamoos.

“Ita-nia sidade no jardin sira fo’er ne’e tanba maluk sira soe foer arbiru. Ezemplu, hanesan ami estudante sira hemu bee ka han hahan ruma iha plátiku la soe iha nia fatin, nune’e ita haree ba jardin sira foer barak,” nia hateten.

Entaun, hanesan estudante ne’ebé di’ak tenke hatene an hodi soe foer iha nia fatin ho loloos, liu-liu soe ba iha lixu fatin ne’ebé Governu prepara ona, nune’e haree ba sidade Dili nia oin ne’e furak no bonita.

Jornalista : Nelia Fernandes

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here