DILI, 29 abríl 2022 (TATOLI)–Prezidente Repúblika eleitu períodu 2022-2027, José Ramos Horta, sesta ne’e, hasoru malu ho Prezidente Parlamentu Nasionál (PPN), Aniceto Longuinhos Guterres Lopes, hodi ko’alia kona-ba serimónia toma pose ba Prezidente foun iha 19 maiu 2022.
Notísia Relevante: Horta hasoru Alkatiri ko’alia koordenasaun Governu salva povu nia moris
Prezidente Repúblika eleitu ne’e heteten, nia parte konkorda katak Prezidente Parlamentu Nasionál, Aniceto Longuinhos Guterres Lopes, iha legalidade atu fó pose ba Prezidente Repúblika eleitu tuir konstituisaun haruka.
“Enkontru ne’e ha’u-nia inisiativa rasik hodi ko’alia kona-ba ajendamentu programa serimónia pose 19 maiu, ne’ebé atu halo hand over hosi Prezidente Repúblika eleitu atu pose no despedida PR atuál ne’e, kompeténsia konstituisional Prezidente Parlamentu Nasionál nian mak halo formalidade ajendamentu,” Ramos Horta hateten ba jornalista sira hafoin ramata enkontru iha sala Gabinete PPN, iha Parlamentu Nasionál.
Entretantu, PR eleitu ne’e mós hasoru malu ona ho Xefe Estadu atuál no Koordenadór Plataforma Oitavu Governu Konstituisional hodi ko’alia prosesu tranzisaun ne’e mai atu la’o di’ak.
“Atu dignifika prosesu hand over tranzisaun ba Prezidente Repúblika ida ba Prezidente Repúblika seluk tenke la’o didi’ak ho dignidade nasaun, hanesan mós ita-nia imajen lideransa nasaun la’o hamutuk, nune’e ha’u kontente halo enkontru substansiál ho Prezidente Parlamentu Nasionál, Aniceto Guterres,” nia dehan.
Durante sorumutu, Ramos Horta foti kestaun kona-ba krize ekonómika, sosiál ne’ebé ameasa daudaun mundu no Timor-Leste diretamente halo situasaun sai defisíl.
“Nune’e, hodi haree líder nasionál, ita hotu hamutuk buka meiu ne’ebé di’ak ba povu ne’ebé kiik labele ki’ak liután,” nia dehan.
Tanba, tuir nia, Timor-Leste iha meiu finanseiru mak tenke iha desizaun polítika hodi ekonomia labele monu tan no problema hamlaha ho má nutrisaun labele aumenta.
“Krize ne’e ita la konsege kontrolu iha Rusia no Ukránia halo mina no mina-han nian folin sa’e,” nia fo hanoin.
Laureadu Prémiu Nobel da Paz ne’e propoin atu Parlamentu Nasionál mós fó nia aprovasaun rekomendasaun ba deklarasaun fraternidade umana ne’ebé Amu Papa Francisco mak halo dokumentu ida importante.
“Prezidente Parlamentu kontente ho ideia ne’e, sei buka fó apoiu aprova nune’e dokumentu refere tama iha ita-nia eskola sira halo parte kuríkulu hahú hosi ensinu primáriu tanba importante lisaun kona-ba fraternidade umana signifika sosiedade mundu tomak ba rai ida-ne’e sempre simu malu,” Ramos Horta hateten.
Notísia Relevante: Ramos Horta husu PR Lú Olo halo diálogu ho líder nasionál
Jornalista : Nelson de Sousa
Editór : Cancio Ximenes
