Sekretária Rejionál ba Asuntu Edukasaun, Solidariedade Sosial no Inkluzaun, Avelina da Costa. Imajen Agência TATOLI /Abílio Elo Nini.

OÉ-CUSSE, 29 abríl 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), planeia iha tinan ne’e sei konstrui sentru formasaun ba profesór sira no fatin hakmatek ka uma mahon ba inan feto sira iha rejiaun ne’e.

“Planu prioridade tinan ne’e, ita sei harii konstrusaun rua, sentru formasaun ba profesór, no uma mahon vítima sira iha parte sosiál, tau oinsá bele iha hela fatin ida natoon atu hela, tanba iha Oé-Cusse iha mós númeru violénsia,” Sekretária Rejionál ba Asuntu Edukasaun no Solidariedade sosiál Inkluzaun, Avelina da Costa, informa ba Agência Tatoli, iha Oé-Cusse, sesta ne’e

Nia informa, razaun harii sentru formasaun ba profesór sira tanba durante ne’e Oé-Cusse seidauk iha inklui uma mahon ba vítima sira, nune’e bele akumula inan feto, sira-ne’ebé iha problema, entaun autoridade prepara fatin hakmatek ka uma mahon ida.

“Parte edukasaun no sosiál ita hatama ona proposta iha Prezidente Autoridade, atu hetan aprovasaun hodi prosesa ba iha aprovizionamentu atu anunsia prosesu konkursu, tanba daudaun ne’e tékniku sira mós prepara ona dokumentu nune’e iha tempu badak sei fó sai anunsiu ba públiku,” nia katak.

Nune’e nia parte seidauk fó-sai detalla kona-ba montante orsamentu ba konstrusaun rua ne’e, tanba sei prosesu konsulta no aprovasaun hosi prezidente autoridade, hafoin halo prosesu konkursu públiku.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here