Sekretáriu Rejional ba Asuntu Administrasaun, Martinho Abani Elu. Imajen Tatoli/Abílio Elo Nini.

OÉ-CUSSE, 29 abríl 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), daudaun ne’e komunika ho Institutu Nasionál Administrasaun Públika (INAP) atu fornese formasaun ba autoridade komunitária hodi hadi’a prestasaun serbisu iha atendimentu administrasaun públika.

“Ita fasilita formasaun ba líder komunitáriu sira, xefe suku, ho estrutura tomak inklui Pesoál Apoiu Administrasaun Suku (PAAS), ne’e importante tanba nível hotu-hotu atu halo serbisu sempre kontaktu ho xefe suku ho xefe aldeia sira,” Sekretáriu Rejionál ba Asuntu Administrasaun, Martinho Abani Elu, ko’alia iha salaun administrasaun Numbei, kinta ne’e.

Tuir nia, presiza fornese formasaun tanba sira-nia partisipasaun ne’e importante, oinsá halo atendimentu di’ak no lideransa ho di’ak entaun presiza investe kapasitasaun.

“Ne’ebé ha’u ko’alia ona ho parte INAP sei bele ita realiza formasaun iha fulan-juñu tinan ne’e, tanba tuir lei númeru 3/2014 kriasaun RAEOA, Oé-Cusse tenke tratamentu rasik, maibé hanesan Ministériu Administrasaun Estatál hanesan liña koordenasaun, ne’ebé laiha problema kuandu ami konvida parte INAP atu fó formasaun kapasitasaun ba xefe sira ho aldeia sira, ne’e autoridade iha kompeténsia tanba ami autoridade tutela direita ba Primeiru Ministru,” nia katak.

Diretór Nasionál INAP, José Araújo Chan, hanesan diretór fromasaun, simu ona pédidu atu apoia formasaun iha futuru, tanba formasaun no aprende ne’e laiha nia rohan.

“Tanba ne’e ha’u agradese ba autoridade RAEOA, ha’u hanoin serbisu hamutuk ne’e importante atu mantein komunikasaun nafatin, nune’e bele fasilita tán formasaun iha futuru,” nia katak.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here