Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO, 29 abril 2022 (TATOLI) – Polísia Nasionál Timor-Leste (PNTL) munisípiu Bobonaro, la tolera ema li’ur ne’ebé organiza grupu hodi asalta estudante iha eskola sekundária Jerál númeru 1, Dom Martinho da Costa Lopez (DMCL) Maliana, ne’ebé daudaun ne’e partisipa hela ezame trimestre dahuluk.

Komandante PNTL Munisípiu Bobonaro, Superintendente Antóninho Mauluta, informa komandu fó ona oirientasaun ba membru sira tún ba terrenu atu koordena ho parte eskola atubele garante  seguransa ba estudante sira tuir prosesu ezame ho seguru no livre hosi ameasa oinoin.

“Ami-nia membru oras ne’e daudaun halo hela patrullamentu no halo koordenasaun ba iha mestre sira hotu atu tau matan likus, kualkér informasaun ne’ebé sira hetan karik, pasa kedas mai lalais iha Polísia atubele foti atuasaun. Bainhira ita atua ona, ita sei la tolera sé sé de’it mak envolve iha problema ne’e,” nia informa jornalista sira, iha kna’ar fatin Maliana, sesta ne’e.

Enkuantu iha loron-kinta ne’e maizumenus tuku 12:00 meudia mosu tán konfrontu iha areadór eskola nia iha grupu li’ur baku estudante sira. Hafoin ida ne’e liu tiha oras balu família hosi estudante halo fali reasaun uza arma branka hanesan sabit no samurai falun oin metin la’o iha estrada laran buka autór ne’ebé baku estudante ne’e, maibé ameasa sira-ne’e la rezulta krime ruma tanba polísia halo kedas prevensaun.

“Sira-ne’e halo reasaun tanba dehan vítima demais ona, entaun sira lori kro’at atu salva-aan, maibé la’ós hanesan ne’e, ita husu bainhira problema informa mai polísia mak bele foti asaun, ema sira-ne’e ita halo ona prosesu investigasaun aplika Termu Identidade Rezidénsia (TIR) atubele haree prosesu tuir mai,” nia subliña.

Purtantu problema ne’e akontese kedas iha loron-segunda ne’e mosu uluk provokasaun hosi ema li’ur ne’ebé deskonfia hosi grupu arte-marsiál balun. Maibé to’o agora polísia seidauk hatene loloos koronolojia hosi kazu ne’e.

Tanba vítima ne’ebé polísia foti mai halo identifikasaun la hato’o deklarasaun loloos ho razaun la koñese autór, ho nune’e membru polísia komunitária sira kontinua rekolla hela informasaun iha terrenu atubele deteta autór prinsipál ba kazu ne’e.

“Ita rekolla informasaun ne’e dehan ema hosi Balibo mak mai halo, maibé vítima mai hateten lahtene, derrepente sai eskola, fatuk mai tiha ami nia ulun ona, tuku ona ami, ida-ne’ebé mak loos, entaun hasu profesór sira hotu tau matan lisuk tanba estudante sira-ne’e farda sei iha isin-lolos ne’e ita hotu nia responsablidade, labele husik de’it, ita tenke koopera malu,” nia hateten.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here