Serimónia abertura ofisiál kursu formasaun lian portugés nível A2 iha salaun eis Kodim, Ainaro, sesta (29/04). Imajen Tatoli/Tomé Amado

AINARO, 29 abril 2022 (TATOLI)—Ministériu Edukasaun Juventude no Desportu (MEJD) no Instituto Camões, sesta ne’e, realiza serimónia abertura ofisiál kursu formasaun lian portugés nível A2 ba profesór iha nível ensinu hotu iha ámbitu projetu PRO-Portugés.

Superintendente Edukasaun munisípiu Ainaro, Celestino de Jesus António, hateten, kursu ne’e sei hahú iha loron 03 maiu 2022.

“Ita iha profesór hamutuk 100 maka sei frekuenta kursu lian portugés durante tinan-ida. Profesór sira  mai hosi postu administrativu haat, ne’ebé kada postu sei delega profesór hamutuk 25,” Superintendente Edukasaun munisipál informa iha salaun eis Kodim Ainaro.     

Nune’e, Celestino de Jesus, konsidera kursu portugés ne’e importante tebes ba profesór sira atu hasa’e koñesimentu ida-idak iha lian portugés hodi bele hadi’a liután kualidade edukasaun iha Timor-Leste.

“Antes ne’e profesór sira frekuenta ona kursu nível A1, maibé programa ne’e paradu tanba situasaun COVID-19, maibé Governu liuhosi Ministériu Edukasaun Juventude no Desportu tinan ne’e reativa filafali formasaun ne’e tuir akordu kooperasaun ne’ebé maka halo ona ho Governu Portugal iha tinan tinan hirak liubá,” nia akresenta. 

Notísia relevante: Profesór tolu sai vensedór iha kompetisaun diskursu lian portugés

Iha fatin hanesan, Ministru Edukasaun Juventude no Desportu, Armindo Maia, informa, kursu hanesan sei realiza mós iha munisípiu seluk inklui Rejiaun Administrativa Espesiál Oé-cusse Ambeno (RAEOA).

“Formasaun ne’e sei hala’o durante oras 120 nia laran. Profesór sira hosi nível ensinu báziku to’o ensinu sekundáriu ne’ebé atu tuir formasaun ne’e hamutuk 4.300 no sei fó hosi formadór hamutuk na’in-86 iha postu administrativu hotu,” Ministru tenik.

Inisiativa ne’e mosu tanba Governu rona preokupasaun hosi sosiedade Sivíl, inan-aman, inklui deputadu sira, katak profesór no estudante sira iha eskola públika ninia kapasidade atu komprende lian portugéza la sufisiente. Tanba ne’e maka ministériu foti desizaun halo kooperasaun ho Governu Portugal liuhosi Instituto Camões no Fundu Dezenvolvimentu Kapitál Umanu (FDCH, sigla portugés) hodi realiza formasaun ba profesór sira.

“Ida-ne’e hanesan kompromisu VIII Governu Konstitusionál atu fó formasaun di’ak ba profesór sira iha disiplina ida-idak ho lian portugés, nune’e sira ho koñesimentu lian portugés sufisiente bele kontinua hanorin estudante sira,” nia akresenta.

Nune’e, governante ne’e iha esperansa profesór sira sei partisipa ativa iha formasaun ne’e no MEJD sei fó apoiu tomak tuir kbiit ne’ebé iha inklui sei hadi’a kurríkulu atu nune’e bele fasilita livru manuál ba profesór sira ho lian portugés hodi bele hakbiit nafatin abilidade iha aula.

Nune’e mós, tuir Xefe Departamentu Peskiza no Fiskalizasaun FDCH, Fernando do Nasimento, programa formasaun ne’e realiza durante tinan barak ona, maibé tinan ne’e FDCH aloka orsamentu hamutuk $1.810.495 hodi apoiu atividade operasionál tomak.

FDCH ho MEJD selebra akordu desde tinan 2019 to’o agora hodi responde ba planu dezenvolvimentu nasionál tinan 2001 to’o 2030, ne’ebé apoiu ne’e sei kontinua la’o to’o atinje ninia meta.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here