Ministériu Asuntu Parlamentár no Komunikasaun Sosiál (MAPKOMS) no Plan International Timor-Leste, sesta ne'e, selebra akordu kooperasaun hodi proteje labarik. Imajen Tatoli/António Daciparu.

DILI, 29 abril 2022 (TATOLI)—Ministériu Asuntu Parlamentár no Komunikasaun Sosiál (MAPKOMS) no Plan International Timor-Leste, sesta ne’e, selebra akordu kooperasaun hodi proteje labarik no asegura labarik feto sira hodi goza direitu ba igualadade.

Akordu ne’e, asina diretamente hosi Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo ho Country Director Plan International Timor-Leste, Dillyana Ximenes.

Ministru Asuntus Parlamentares no Komunikasaun Sosiál (MAPKOMS), Francisco Martins da Costa Pereira Jerónimo, hateten objetivu asina akordu ne’e atu Governu prepara kondisaun, hanesan rádiu hodi sai hanesan meiu ida atu Plan Internasionál bele utiliza hodi disemina informasaun atu proteje ba labarik feto ne’ebé dala barak hetan problema.

“Ita-nia objetivu prinsipál mak atu oinsá mak Governu ho Plan Internasionál halo atividade ida atu foka protesaun, liu-liu ba labarik feto sira ho ita-nia inan-feton sira,” Francisco Martins da Costa Pereira Jerónimo hateten ba jornalista sira, hafoin asina akordu kooperasaun ho Plan Internasionál iha salaun Auditóriu Prezidénsia Konsellu Ministru (PCM), Dili, sesta ne’e.

Kooperasaun ho durasaun tinan tolu (3), nune’e kooperasaun sei kontinua tanba antes ne’e kooperasaun iha ona maibé tanba kooperasaun ne’e ramata ona, entaun tenke asina fila-fali atu nune’e hala’o servisu ne’e ba oin.

“Hein katak ho kooperasaun ida ne’e, ba oin ita dezenvolve di’ak liután saida mak ita hotu hakarak,” Governante ne’e hateten.

Entretantu, memorandu entendimentu ne’e nu’udar dokumentu ofisiál entre parte rua hodi hametin kooperasaun servisu iha área komunikasaun sosiál ho perspetiva protesaun ba labarik no asegura labarik feto goza direitu ba igualdade.

Ho nune’e, Plan International Timor-Leste disponivel estabelese kooperasaun ho MAPKOMS nu’udár orgaun soberania Estadu foku ba integrasaun jéneru iha estratéjia komunikasaun sosiál Estadu nian, hodi garante labarik feto nia direitu fundamentál integra iha prioridade nasionál.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here