DILI, 29 abríl (TATOLI)–-Diretór Jerál Administrasaun Finansa iha Ministériu Administrasaun Estatál (MAE), Agostinho da Costa, hateten MAE hamutuk Ministériu Edukasaun juventudade no Desportu (MEJD) ho World Food Program (WFP) halo konsultasaun proposta dekretu-lei merenda eskolár 2022 nian.
“Ho ida-ne’e ita hetan tulun ka apoiu hosi ita-nia parseria desenvolvimentu World Food Program (WFP) organiza ba sesaun traballu ida-ne’e hanesan meiu hodi halo konsultasaun ida iha faze elaborasaun hosi ita-nia asesor Doutor Rui Daniel Bele,” Agostinho da Costa hateten ba Agência TATOLI, iha salaun City8, Has laran, Dili, sesta ne’e.
Iha fulan kotuk, nia dehan, hala’o ona diseminasaun sirkulár oinsá atu bele fasilita ezekusaun Orsamentu Jerál Esatdu (OJE) 2022 ba programa merenda eskolár ho di’ak iha tinan 2022 hodi hein finalizasaun Dreketu-Lei ba Programa Merenda Eskolár nian.
“Tanba ne’e, ohin, MAE liuhusi Gabinete Dirasaun Jerál Administrasaun no Finansa, konvida ita hotu mai partisipa sesaun traballu ida-ne’e tanba sesaun ida-ne’e, importante tebes hodi bele fo ideia sira, liu-liu Diretór Jerál no Diretór Nasionál hosi Ministériu Edukasaun Juventude no Desportu (MEJD), Prezidente Autoridade Munisipál (PAM) no Administradór Munisípiu (AM) sira-ne’ebé durante ne’e jere hela orsamentu merenda eskolár nian,” nia dehan.
Nune’e, iha elaborasaun Matadalan Dekretu-Lei ne’e bele akomoda ona ema hotu-hotu nia hanoin, hodi fasilita parte hotu nian sai hanesan rekezitu ida ligadu ho ezekusaun no implementasaun programa Merenda Eskolár iha futuru.
Agora daudaun, iha nivel autoridade munisipál no administrasaun munisipál ba to’o tiha nível eskola bázika sentrál no filiál sira, utiliza ona matadalan ezekusaun orsamentu transferénsia públika banati tuir Dekretu Guverno Númeru 13/2022, 18 janeiru, iha artigu 30 pontu 15-16 ne’ebé regula kona-ba ezekusaun orsamentu merenda eskolár nian.
Dekretu-Lei ne’ebé agora daudaun sei iha faze elaborasaun ne’e mós sei banati regra no prosedimentu sira mai hosi Dekretu Governu ne’e.
“Sesaun traballu ida-ne’e importante tebes hodi bele rona ita hotu no ema barak nia hanoin kona-ba elaborasaun proposta dekretu-lei ida-ne’e, molok submete ba ministru atu bele ba diskute iha Konsellu Ministru. Bainhira Konsellu Ministru aprova ona mak sai matadalan ida hodi bele guia ita ba implementasaun merenda eskolár iha future,” nia dehan.
Diretór Jerál Administrasaun Jesatun no Finansa MEJD, Antonino Pires, hateten durante ne’e MEJD hala’o programa merenda eskolár no iha mudansa maibé iha buat balun ne’ebé mak presiza suporta tanba seidauk sufisiente.
“Implementasaun programa refere sei buat barak mak menus, tanba ne’e enkontru ohin ne’e atu bele hadi’a di’ak liután programa merenda eskolárr,” nia dehan.
Tanba peskiza hatudu katak dezempeñu eskolár ba labarik sira influénsia fatór individu no ambientál, nune’e alimentasaun ne’e mak papel determinadu ba dezenvolvimentu no kognitivu tanba afeta ba fatór hanesan intelijénsia, aprendizajen, memoria, konsentrasaun no kontestu eskolár nian.
“Evidensia ne’e hatudu des-nutrisaun bele lori problema komportativu hosi implementasaun programa refere,” nia hateten.
Diretór Estratéjiku WFP, Suresh Lakshminarayana, hateten liuhosi enkontru ne’e WFP atu fó apoiu tékniku para finaliza diskusaun projetu deketru-lei refere hodi rekomenda ba Governu orsamentu ba merenda eskolár ne’ebé kada alunu ida hetan sentavus 0,25 hasa’e ba sentavus 50 kada loron ida.
“WFP rekomenda ba Governu aumenta orsamentu sentavus 0,25 ba sentavus 50 relasiona ho aumentu presu ai-han iha terrenu,” nia dehan.
Ba tinan 2022-2026 ne’e, WFP aumenta tan osan millaun $4 ba implementasaun programa merenda eskolár iha territóriu nasionál.
Jornalista : Osória Marques
Editór : Cancio Ximenes
