KSTL halo koneferensia imprensa hodi husu Governu atu efetivu haforsa estimulasaun ekonómia situasaun defisil. Imajen/Mídia KSTL.

DILI, 29 abríl 2022 (TATOLI)–Sekretáriu Jerál Interinu Konfederasaun Sindikatu Timor-Leste (KSTL), António da Costa Martins, hateten KSTL husu Governu atu efetivu haforsa estimulasaun ekonómia situasaun defisil.

“KSTL rekomenda ba Governu atu efetivu haforsa estimulasaun ekonómia iha situasaun defisil ida-ne’e, nune’e bele trava impaktu bootliu ne’ebé sei afeta hosi problema inflasaun ne’ebé kontinua sa’e,” Sekretáriu Jerál Interinu KSTL ne’e hateten iha konferénsia imprensa ba jornalista sira, iha edifísiu KSTL, Santa Crus, Dili, sesta ne’e.

Governu presiza apoiu no konsentra hodi dezenvolve no haforsa indústria sira iha rai-laran hodi halo produsaun barak ba sásan liu-liu nesesidade báziku sira-ne’ebé povu persiza no minimiza ona dependente ba nesesidade báziku mai hosi rai-li’ur.

“Investimentu hosi Estadu importante tebes no reforsa instituisaun relevante sira,” nia akorda.

Biban ne’e, KSTL rekomenda ba Líder Nasionál sira hotu atu kontinua hametin unidade nasional, promove diálogu nasionál nu’udar dalan no mekanizmu ne’ebé di’ak atu buka solusaun politika ba futuru nasaun nian.

“Ohin loron povu persiza ukun-na’in sira atu konsentra ba servisu, servisu no servisu makaas liután hodi rezolve problema ekonómia no sosiál ne’ebé povu enfrenta duké problema polítika no jogu polítika sira-ne’ebé sei haterus liután ba povu,” nia dehan.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here