Autoridade lokál hamutuk ho juventude sira partisipa diálogu kona-ba re-intregasaun eis dadur na’in-rua hosi HDS iha área Uainiki, Bahú Baucau, sesta (29/04). Imajen TATOLI/Natalino Belo.

BAUCAU, 29 abríl 2022 (TATOLI) – Organizasaun Hakmanek Direitu Sidadaun (HDS) sesta ne’e, realiza diálogu ho komunidade kona-ba re-intregasaun eis dadur hodi prevensaun konflitu iha aldeia Ro-ulo, suku Bahú, postu administrativu Baucau vila.

Diretór Organizasaun Hakmanek Dereitu Sidadaun (HDS), Leo dos Santos hateten ezisténsia organizasaun refere harii atu tau matan ba sidadaun liuliu direitu prizioneiru sira ne’ebé laiha kbiit natoon atu hetan asisténsia justisa.

HDS hala’o kooperasaun ho establesementu prizionál liuhosi atividade hanesan formasaun kontrola hirus no prevensaun konflitu ba dadur iha prizaun inklui realiza diálogu bainhira re-intregasaun dadur sira iha komunidade nia leet.

Diretór HDS, Leo dos Santos. Imajen TATOLI/Natalino Belo.

“Diálogu ne’e parte hosi advokasia ba joven sira, dalaruma interpretasaun prizaun haan toba de’it tanba ne’e envolve direita eis dadur sira atu esplika esperiénsia durante kumpri iha prizaun nune’e espera katak bele redús krime iha komunidade,” Diretór HDS hateten iha Uainiki, sesta ne’e.

Objetivu mak hametin relasaun amizade eis dadur ho familia vítima nune’e esplika kona-ba lala’ok re-intregrasaun atu komunidade sira bele komprende, ne’ebé partisipa mos hosi autoridade lókal no Ofisial Polisia Suku (OPS) no joventude sira hanesan parte hosi alvu ba programa refere.

Atividade refere antes ne’e realiza suku Ponilala, bainhira re-intrega eis dadur na’in-lima, Surikmas munisípiu Dili na’in-ida no ohin iha suku Bahú, postu Baucau vila na’in-rua.

“Pelumenus minimiza krime tanba ema-nia karaterístika ita labele muda depende liuhosi diálogu ne’e hanoin ona sira-nia moris iha futuru,” Leo akresenta.

Xefe departamentu servisu prizionál establesementu Bekora, Januário Freitas Ximenes hateten diálogu re-intregasaun eis prizionáriu importante tebes tanba bazea ba Dekretu-Lei númeru 14/2014, loron 14 maiu kona-ba dadur nia nesesidade nu’udar matadalan ba sira atu re-intrega ba komunidade no família inklui sosiedade.

Atu re-intrega eis prizionáriu ba komunidade liuhosi prosesu hanesan liuhosi diresaun nasionál servisu prizaun sosiál hamutuk ho establesementu prizionál tolu hanesan Bekoro, Gleno no Suai bainhira prizionáriu kumpri ona pena ½ ne’ebé liuhosi faze establesementu prizionál prepara dadur nia relatóriu bom komportamentu no diresaun nasionál servisu prizonál sosiál prepara relatóriu sosiál.

Xefi Departamentu Servisu Prizionál Becora, Januário Freitas Ximenes. Imajen TATOLI/Natalino Belo.

“Rua ne’e junta hamutuk ita aprejenta ba tribunál hodi husu paresér iha Ministéru Públiku bainhira tama ona rekizitu bele ona fó livre dadur sira,” Januário Freitas hateten.

Durante dadur sira iha prizaun aprende formasaun sira ne’ebé kolabora entre establesementu prizionál hamutuk ho parseiru sira hanesan organizasaun sosiedade sivíl, governu liuhosi minisiteiru sosiál, edukasaun no igreja.

Matéria formasaun mak hanesan karpintária, perdreiru, soru-tais, suku ropa no formasaun kona-ba edukasaun kona-ba analfabetizasaun.

Tuir dadus, tótal dadur iha prizaun bekora hamutuk ema na’in-472, Gleno 100-resin no Suai 100- resin hamutuk hotu na’in-600-resin.

Jornalista    : Natalino Belo

Editór           : Evaristo Soares Martins

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here