INAP ensera formasaaun kona-ba atendimentu públiku ho professional iha RAEOA. Imajen Tatoli/Abílio Elo Nini.

OÉ-CUSSE, 29 abríl 2022 (TATOLI) – Institutu Nasionál Administrasaun Públika (INAP), hamutuk Autoridade Rejiaun Administrativa Espesiál Oé-Cusse Ambeno (RAEOA), kinta ne’e ensera formasaun iha área haat ba funsionáriu sira hodi hasa’e abilidade ba atendimentu administrasaun públika.

Sekretáriu Rejionál ba Asuntu Administrasaun, Martinho Abani Elu, hatete, formasaun ne’e bele apoia ona funsionáriu sira nu’udar servidór estadu, nune’e nia husu atu hatudu profisionál iha atendimentu administrasaun públika.

“Formasaun ne’e ita haree oinsá iha futuru bele mellora di’ak liután formasaun ne’e, oinsá nível diretór, xefe departementu, xefe sesaun to’o funsionáriu hotu, durante loron haat imi tuir ona formasaun, imi aproveita didi’ak matéria sira-ne’ebé hetan ona hosi INAP, sei la 100% atu realiza agora, maibé iha futuru rezultadu sei iha, tan ne’e autoridade husu atu hatudu profisionál nu’udar servidór estadu,” Martinho Abani Elu, ko’alia iha enseramentu formasaun iha salaun administrasaun Numbei.

Nia espera hafoin formasaun ne’e bele aplika terrenu tanba RAEOA nia eestutu espesiál, presiza kapasita atu hasa’e abilidade, koñesimentu nune’e iha futuru bele fornese atendimentu ne’ebé di’ak ba komunidade, tanba hanesan funsionáriu públiku sira-nia kna’ar mak fornese atendimentu.

Diretór Nasionál INAP, José Aroujo Chan, hanesan diretór fromasaun, agradese ba autoridade RAEOA, tanba fó oportunidade ba INAP hodi fornese formasaun ba funsionáriu sira iha rejiaun ne’e.

“Formasaun ne’e nia sentidu hetan ona koñesimentu jerál no esperiénsia liuliu ekipa protokolu, oinsá simu bainaka, no oinsá jere atividade formál ruma, maibé persiza hatudu atitude no hahalok, saida mak ita-boot sira hetan la hatudu ita-nia koñesimentu no esperiénsia, signifika durante formasuan laiha valór,” nia fó hanoin.

Formandu Anton Ulan, atuál jestór sub-rejiaun Pássabe, reprezenta formandu sira, agradese ba autoridade RAEOA tanba buka dalan koordena ho Governu sentrál atu hasa’e liutan abilidade servidór Estadu iha Oé-Cusse liuhosi formasaun.

“Ami agradese ba INAP, ho vontade di’ak serbisu hamutuk ho ami, lakohi husik Oé-Cusse atu la’o mesak, maibé apoia nafatin hodi habelar informasaun, hato’o koñesimentu halo ami matenek hasa’e ami-nia prestasaun serbisu,” nia orgullu.

Iha formasaun ne’e fahe ba ekipa haat, ekipa ida jestaun lideransa envolve formandu hamutuk na’in-32, jestaun eskritóriu envolve formandu na’in-21 no jestaun protokolu mós envolve formandusna’in-21, hala’o durante semana ida, ho totál 40 oras.

Nune’e mós kona-ba Teknolojia Informasaun (IT) sei realiza durante fulan rua, hahú abríl ne’e to’o juñu, envolve formandu na’in-46.

Iha enseramentu formasaun ne’e parte Autoridade ho INAP atribui sertifikadu ba formandu sira, tanba formasaun realiza iha Oé-Cusse, pedidu hosi Prezidente Autoridade RAEOA ba INAP hodi mai fornese formasaun iha área haat, kona-ba lideransa, jestaun eskritóriu, jestaun protokolu no Informasaun Teknolojia (IT) ba funsionáriu sira iha RAEOA.

Notísia relevante: INAP fasilita formasaun hasa’e abilidade iha atendimentu administrasaun públika

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here