Diretór CNE Viqueque, Honorio da Cruz. Imajen Tatoli/Vitorino Lopes da Costa

VIQUEQUE, 28 abril 2022 (TATOLI)–Komisaun Nasionál Eleisaun (CNE, sigla portugés) hahú koordenasaun ho ekipa susesu Kandidatu Prezidente Repúblika (PR) sira hodi hamoos materiál kampaña iha fatin públiku sira.

“Ita hahú halo koodensaun ho ekipa susesu kandidatu ida-idak halo limpeza ba matéria eleitorál ba kampaña prezidensiál ne’ebé taka iha fatin públiku sira. Dentru hosi loron-hitu, signifika hamoos hahú loron 20 to’o 26 abril, hafoin eleisaun prezidensiál ne’e ramata,” Diretór CNE Viqueque, Honorio da Cruz, hateten iha ninia knaar fatin, sesta ne’e.

Notísia relevante: STAE-CNE Viqueque hahú distribui materiál eleisaun ba sentru votasaun 92

Nia dehan, bainhira ekipa susesu sira la halo limpeza ba materiál kampaña, CNE sei uza ninia kompeténsia kolabora ho autoridade munisipál no seguransa hodi halo asaun limpeza direta ba materiál propaganda eleitorál.

“Iha terrenu ita haree materiál lubuk ida mak sei husik, nune’e horiseik ami konsege halo ona limpeza hamutuk ho ita-nia ofisiál supervizaun CNE sira inklui parte seguransa sira,” nia akresenta.

Tuir Diretór, objetivu hosi hosi limpeza materiál ba kampaña eleitorál hodi kumpre dekretu-lei númeru 03/2022, iha artigu 15 ne’ebé sita orientasaun hamoos materiál propaganda eleitorál.

“Ita atu kria ambiente moos hafoin atividade kampaña ramata, nune’e ita hamoos hotu hodi sai fali ambiente normál. Portantu ita hakarak oferese filafali vida normál ba ita-nia komunidade, durante fulan-ida tomak atividade polítika la’o,” nia realsa.

Atividade ne’e hala’o iha munisípiu lima iha Viqueque, iha fatin públiku ba atributu kampaña.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here