Futuru edifísiu Dili Financial Business Center. Imajen/Florencio Miranda Ximenes.

DILI, 28 abríl 2022 (TATOLI)-Ministru Justisa, Tiago Amaral Sarmento, hateten nia parte simu ona informasaun husi Tribunál Rekursun (TR) katak rai no uma ne’ebé maka durante ne’e kompañia ENSUL aluga laós rai Estadu maibé  partense ba rai privadu.

“Desizaun husi Tribunál Rekursu (TR) nian katak rai no uma ne’ebé kompañia ENSUL  aluga  ne’e ba ema ida nian no kazu ne’e ami mós foin rona horiseik (27/04/2022),”Governante ne’e relata ba jornalista sira hafoin partisipa serimonia lansamentu relatóriu JSMP 2021 iha El Legendariu Lecidere, kinta ohin.

Notísia Relevante :Tempu besik, MJ formaliza akordu arrendamentu ho empreza ENSUL

Antes ne’e, iha loron 25 fulan-abríl 2022, Ministru Justisa (MJ), Tiago Amaral Sarmento, hala’o reuniaun dahuluk ho Prezidente ENSUL engenharia, Alexandre Marques Couto, hodi ko’alia kona-bá konstrusaun Dili Financial Business Center (DFBC), ne’ebé konstrui iha rai Estadu ho objetivu atu selu arrendamentu ba Estadu.

Maibé Tribunál Rekursu deside rai ne’e sidadaun ida nian, tanba ne’e Ministériu Justisa planea sei konvida dirijente husi Empreza Internasionál ne’e hodi halo diskusaun nune’e bele hetan konkordansia ikus, tanba  estatutu rai ne’e iha hela tranzitu injulgadu.

“Maibé ami sei bolu parte ENSUL hodi diskute katak desizaun husi Tribunál Rekursu nian kona-ba rai no uma ne’e pertense ba Estadu ka oinsá, tanba desizaun Tribunál nian ne’e bo’ot liu desizaun hotu-hotu, ita tenke hakruk ba nia,” Tiago Amaral Sarmento hateten.

Entretatu, Empreza ENSUL Engenharia hosi Portugál hala’o ona ninia serbisu iha Timor-Leste dezde 2000, asina kontratu atu hari’i DFBC iha tinan-2012 no lansamentu ba konstrusaun ho fatuk-dahuluk realiza iha loron 16 dezembru 2013.

Konstrusaun Dili Financial Business Center (DFBC) ka Sentru Negósiu no Finansa ne’e pertense ba empreza ENSUL nian,  ne’ebe lokaliza iha Colmera, ho dimensaun 16.000 m².

Daudaun ne’e konstrusaun atinje ona andar-15 ho 60%, ho kustu orsamentu millaun $30 no obra ne’e sei ramata iha tinan-2023 nia rohan.

Notísia Relevante :Kompañia Lokál 10 Ezije Atu Selu Arrendamentu Direta Ba Estadu La’ós Ba Ensul

Jornalista: Natalin Costa

Editór   : Agapito dos Santos

PUBLISIDADE HUSI MTCIiklan

2 KOMENTÁRIU

  1. Se Tribunal Rekursu dehan fatin ne’e ema individuál ida nian, tenke dehan sai loloos ema ne’e sé. Juiz Tribunál Rekursu nian ne’e mós ema, nune’e, dala ruma nia bele simu subornu hodi foti desizaun la loos. Ida-ne’e presedente ida la di’ak tanba bele akontese, ou akontese tiha ona dala balu karik, katak edifísiu sira-ne’ebé uluk Indonézia hussik hela balu bele mai reklama fali dehan sasán sira ne’e propriedade privada nian.

  2. Buat balun la los ona Tamba lolos Rai nebe uluk partense ba governu indonesio ou portugal ne se administra hotu gusi governo Timor Leste. Ita Hein labele Iha mafia Iha tribunal

HAKEREK NO HATÁN

Please enter your comment!
Please enter your name here