Governu Timor-Leste no parseiru internasionál no nasionál sira halo lansamentu relatóriu peskiza, iha Suai Room, Timor-Plaza, kinta (28/04). Imajen Tatoli/Francisco Sony

DILI, 28 abril 2022 (TATOLI)—Governu Timor-Leste liuhosi Ministru Finansa (MF), Rui Augusto Gomes no Governu Austrália liuhosi Embaixadór Austrália iha Timor-Leste, Bill Costelo, kinta ne’e, lansa relatóriu peskiza ‘Populasaun Juventude Timor-Leste: Dezafiu Empregu hosi Populasaun Juventude Boot.’

Biban ne’e, Ministru Rui Gomes konsidera relatóriu ne’e kompriensivu tamba aprezenta faktu kona-ba situasaun empregu juventude, oportunidade empregu, prioridade polítika empregu, inklui polítika atu ajuda foin-sa’e timor-oan sira asesu ba empregu.

“Haree hosi estrutura demográfiku, Timor-Leste nia populasaun, liuliu grupu ho idade serbisu entre tinan 15 to’o 24, ne’ebé reprezenta 37% (sensu populasaun 2015). Ba ha’u, relatóriu ne’e hanesan alerta ida mai ita hotu katak iha desvantajen lubuk ida kuandu iha populasaun juventude ne’ebé boot iha piramida otas,” Ministru hateten iha Suai Room, Timor-Plaza.

Notísia relevante: SEFOPE prepara enomeradór rekolla dadus empregu no dezempregu

Maski nune’e, governnate ne’e rekoñese populasaun ho númeru juventude boot iha desvantajen hanesan dezempregu, ne’ebé tuir relatóriu ne’e 33,6%, hatudu katak taxa a’as tebes no iha futuru númeru ne’e bele sa’e liután.

“Relatóriu ne’e mai iha tempu oportunu atu fornese informasaun xave sira ba polítika, programa no asaun sira iha futuru. Hosi perspetiva Ministériu Finansa, daudaun ne’e ami prepara hela Orsamentu Jerál Estadu (OJE) 2023 no espera katak ho informasaun ida-ne’e, ita-nia polítika públiku sei bele efetivu liután,” nia akresenta.

Ministru mós apresia inisiativa, ho esforsu hosi Department of Foreign Affairs and Trade  (DFAT) Embaixada Austrália, ne’ebé fó apoiu finanseiru hodi bele prodús relatóriu importante ne’e, inklui Monash University, ba Autór sira hanesan Profesór Brett Inder, Nan Qu, no Leoneto Elizário.

Peskiza públika ne’e foka kona-ba nesesidade urjensia atu investe iha inisiativa sira fó serbisu ba juventude sira iha Timor-Leste tanba tuir dadus iha foin-sa’e 30.000 ne’ebé kompleta ona edukasaun no prontu tama iha forsa traballu kada tinan, maibé serbisu foun ne’ebé kria iha de’it 2.275 iha tinan 2021.

Relatóriu ne’e fó estimasaun katak Timor-Leste nia juventude dezempregu dadaun ne’e tama ona ba 30%, hosi joven ida hosi joven na’in-tolu mak buka hela serbisu, maibé la hetan.

Iha biban hanesan, Embaixadór Austrália, Bill Costello, hateten, parte Austrália komprometidu serbisu hamutuk ho Governu Timor-Leste hodi tulun buka solusaun ba kestaun kona-ba juventude dezempregu.

Nune’e mós, Peskizadór, Brett Inder, hateten, objetivu relatóriu ne’e hodi fó hanoin ba foin-sa’e iha futuru di’ak hodi forma no kria oportunidade foun ba empregu.

Diretór Nasionál Estratejia Empregu hosi Sekretaria Estadu Formasaun Profisionál no Empregu (SEFOPE), Jenifer António da Cruz Pui, konsidera relatóriu ne’e hanesan dezafiu no oportunidade foun ba Timor-Leste.

“Ita presiza hakle’an liután forsa polítika liga ba formasaun profisionál, atu nune’e ita-nia idade joven sira ne’ebé ohin aprezenta barak loos ne’e bele hetan kapasitasaun abilidade atu kompete iha merkadu traballu,” nia akresenta.

Diretór ne’e konsidera bainhira kreximentu joven sa’e maibé laiha oportunidade empregu  hanesan obstáklu ida mai Timor-Leste.

“Ida-ne’e presiza haree, nune’e ita halo polítika kriasaun empregu iha rai-li’ur no ita mós tenke iha ona polítika atu halo promosaun ba kriasaun empregu iha ita-nia rai. Ida-ne’e mak SEFOPE presiza investe. Daudaun ne’e SEFOPE iha sentru formasaun lubuk ne’ebé fó formasaun ba joven sira, maibé presiza haforsa liutan liuliu ba setór agrikultura tanba joven barak mak tama setór agrikultura,” nia sujere.

Prosesu peskiza ba relatóriu ne’ebé rasik hamutuk ema peskizadór na’in sanulu hosi Timor-Leste no kustu $10.000.

Relatóriu ne’e deskreve kria oportunidade serbisu liuhosi setór agrikultura, tanba timor-oaan 37% ho idade adultu mak serbisu ona iha área ne’e no setór privadu fó serbisu ba ema hamutuk 50.000, ne’ebé mekanizmu ne’e bele sai solusaun ba dezafíu juventude dezempregu iha Timor-Leste.

Rekomendasaun iha relatóriu ne’e inklui mós mekanizmu atu hadi’a edukasaun báziku hosi primária to’o sekundária, inklui investe iha formasaun profisionál no ensinu superiór hodi asegura katak ema hotu iha abilidade no prontu atu serbisu.

Eventu ne’e organiza hosi Austrália liuhosi programa Dezenvolvimentu ba Forsa Traballu Timor-Leste (WDPTL, sigla inglés) no Governasaun ba Dezenvolvimentu (GfD, sigla inglés) liuhosi kolaborasaun ho SEFOPE.

Seremónia ne’e envolve mós ho painél diskusaun ho reprezentante sira hosi Governu no setór privadu inklui emprezáriu sira ne’ebé mak fahe esperiénsia kona-ba kriasaun oportunidade serbisu ba foin-sa’e timor-oan iha ida-idak ninia área.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here