Ministru Edukasaun Joventude no Desportu, Armindo Maia. Imajen Tatoli/Francisco Sony

DILI, 28 abril 2022 (TATOLI)–Ministru Edukasaun Juventude no Desportu (MEJD), Armindo Maia, lansa programa Apoiu Lideransa liuhosi Mentoria no Aprendizajen (ALMA) atu kapasita profesór sira iha territóriu nasionál hodi hadi’a kualidade edukasaun iha Timor-Leste.

“Programa ALMA ne’e ita hotu hatene hanesan programa ministériu ne’ebé hetan apoiu hosi Governu Austrália. Programa ne’e destina ba mestre, diretór edukasaun, koordenadór inklui parte administrasaun sira. Programa ALMA ninia sentidu maka apoiu ba lideransa liuhosi mentoria no aprendizajen,” Ministru hateten iha Eskola Ensinu Báziku Sentrál (EBC, sigla portugés) númeru 5, Comoro, kinta ne’e.

Notísia relevante: MEJD ezekuta ona 33% OJE 2022 iha trimestre dahuluk

MEJD fó importánsia ba programa ne’e tanba hakarak hasa’e kualidade rekursu umanu ne’ebé di’ak liu iha área edukasaun.

“Kualidade edukasaun la sukat ho rekursu materiál maibé ho rekursu ema. Maski edukasaun Timor-Leste bele iha fasilidade hanesan livru no uma kompletu maibé rekursu umanu hadi’a edukasaun iha Timor-Leste sei laiha mudansa. Kuandu ita-nia mestre, diretór no koordenadór eskola sira laiha kapasidade jestaun di’ak atu hanorin estudante sira. Ita bele investe buat hotu maibé bele dehan marka pasu nafatin. Tanba ne’e, programa ne’e importante atubele investe ba kualidade edukasaun liuhosi mestre no jestór edukasaun sira,” nia akresenta.

Iha fatin hanesan, Vise Embaixada Austrália iha Timor-Leste, Suzy Wilson, agradese ba kolaborasaun MEJD hanesan na’in ba programa ALMA, ne’ebé fó ona oportunidade ba sira atu bele implementa programa iha munisípiu 10 iha territóriu laran tomak no konsege kobre ona eskola hamutuk 552 inklui servisu hamutuk ona ho lideransa 774 inklui manorin hamutuk 223.

Programa ALMA ninia introdusaun no implementasaun inklui sustentabilidade tama ona iha faze da-VIII ba eskola iha munisípiu sira, tanba ne’e faze dahuluk hahú iha munisípiu Manatuto no Liquiçá, iha eskola hamutuk 58, ekivalénsia 50% líder eskola na’in-81 inklui inspetór na’in-ualu no manorin feto potensiál na’in-rua.

Tuir kedan munisípiu Dili inklui Ataúru, Aileu no postu Lacluta iha Viqueque realiza ona ba eskola 74 ekivalénsia 50% ba líder eskola na’in-108 inklui inspetór na’in-ualu no manorin feto potensiál na’in-haat.

Iha fali munisípiu Baucau, Viqueque no Bobonaru realiza ba eskola 80, líder eskola na’in-109 inklui inspetór na’in-10, no manorin feto potensiál na’in-14, munisípiu Baucau, Viqueque no Manufahi iha eskola 82, líder eskola na’in-108 inklui inspetór na’in-neen no manorin feto potensiál na’in-14.

Munisípiu Lautém iha eskola 71 ekivalénsia 100% iha líder eskola hamutuk na’in-99 mak partisipa inklui inspetór na’in-lima no manorin feto potensiál na’in-14, nune’e mós munisípiu Covalima implementasaun ba eskola 77 ekivalénsia 100% tanba iha líder eskola hamutuk na’in-107 mak partisipa inklui inspetór na’in-lima no manorin feto potensiál na’in-17.

Nune’e mós, Liquiçá no Manatuto implementa ona ba eskola 52 ekivalénsia 50%, ne’ebé envolve líder eskola hamutuk na’in-74 mak inklui inspetór na’in-ida no manorin feto potensiál na’in-15, tuir mai Aileu no Dili implementa tan ba eskola 51 ekivalénsia 50% hetan partisipasaun hosi líder eskola na’in 103 inklui inspetór na’in-rua no manorin feto potensiál na’in-33

Ho nune’e, tuir dadus ne’ebé MEJD fó sai katak programa ALMA ne’ebé implementa ona iha munisípiu 10 ne’e konsege kobre ona eskola 552 inklui Eskola EBC hamutuk 600 no líder eskola hamutuk na’in 830, inklui feto na’in-726, mane na’in-726 no manorin feto potensiál 121, manorin 3.223 no kanorin 78,686 iha tinan 2020.

Enkuantu hosi programa ALMA ne’e rasik iha kompenenti haat mak hanesan Formasaun Lideransa Edukasionál, Mentoria (apoiu iha eskola) Grupu Traballu ba Profesór (GTP) no Integrasaun Teknolojia Edukativa.

Jornalista : Tomé Amado

Editora     : Julia Chatarina          

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here