Ekipa téknika hahú mobiliza mákina pezada hodi normaliza dalan kotu iha suku Dilór liga bá postu Lacluta, kinta (28/04). Imajen Tatoli/Vitorino Lopes da Costa

VIQUEQUE, 28 abril 2022 (TATOLI)—Komunidade postu Lacluta, ho inisiativa rasik halibur osan hamutuk hodi hadi’a dalan ne’ebé kotu iha suku Dilór liga bá postu Lacluta.

“Ami hetan autorizasaun hosi administradór postu Lacluta no ami hahú halibur osan hosi komunidade, autoridade, no seguransa  hodi hadi’a dalan ne’ebé kotu iha janeiru tinan ne’e,” Xefe suku Dilór, Jacinto Ximenes, hateten ba Agência Tatoli, iha postu  Lacluta, kinta ne’e.

Notísia relevante: Komunidade Lacluta husu MOP aselera hadi’a estrada kotu

Líder komunitáriu ne’e haktuir, dalan ne’ebé kotu difikulta komunidade lokál halo movimentu, liu-liu iha tempu udan transporte labele liu.

“Bainhira tempu udan, karreta ne’ebé lori sasán atu fa’an labele tama. Ita hein Governu bainhira maka to’o mai hodi normaliza dalan, se ita hein loos de’it difikulta komunidade atu sosa sasán ruma labele tanba kareta labele tama. Tempu udan la tun, entaun kareta sira liu hosi mota maka bá postu Lacluta, maibé tempu udan karreta labele asesu,” Jacinto esplika.

Tanba ne’e, komunidade tau hamutuk osan, balun $1 to’o $5 no profesór balun bele fo $10 hodi aterru dalan ne’ebé kotu.

“Ita konsege halibur osan $400 resin hosi komunidade, hodi finansia operasaun eskavatór durante loron-rua no balun ami sosa mina ba eskavatór,” nia akresenta.

Tuir líder komunitáriu ne’e, bainhira iha enkontru ruma, autoridade lokál sempre hato’o beibeik problema dalan kotu iha suku Dilór, maibé laiha resposta.

“Tanba ne’e autoridade hamutuk ho komunidade mobiliza rekursu rasik hodi normaliza dalan kotu iha suku Dilór, hahú halo serbisu iha kuarta ne’e no daudaun kontinua halo dreinajen bee nian. Ha’u husu ba autoridade munisípiu no Ministériu Obra Públika (MOP) Viqueque, bainhira iha problema kiik ne’e la presiza hein Governu sentrál maka hadi’a, tanba problema kiik ita bele responde lalais,” nia dehan.

Iha fatin ketak, Diretór MOP Viqueque, Mário do Rego, hateten, dalan ne’ebé kotu iha suku Dilór, antes ne’e hato’o ona relatóriu ba diresaun nasionál.

“Dalan Dilór kotu ne’e ninia relatóriu ha’u hato’o ona ba nasionál inklui imajen dalan nian haruka ba, maibé la iha resposta,” Jacinto Ximenes tenik. 

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here