Selesaun Nasionál U-23. Imajen/Espesiál

MALÁZIA, 27 abríl 2022 (TATOLI)-Ekipa selesaun nasionál Timor-Leste U-23, iha fulan-maiu 2022 ne’e, sei partisipa kompetisaun jogu futeból entre nasaun sira iha Sudeste Aziátiku (SEA Games,sigla inglés)  ba dala 31, iha Hanoi Vietname ne’ebé maka sei hahú iha loron 12 to’o 23 maiu.

Guarda rede prinsipal ekipa selesaun nasionál Timor-Leste U-23, Junildo Manuel de Castro Pereira. Imajen/Tatoli Hortencio Sanchez.

Ekipa selesaun nasionál U-23 daudaun ne’e, hala’o hela treinamentu téknika oinsá halo kontra no atake  hasoru adversáriu iha nasaun Malázia no tuir planu sei kontinua aranka bá Hanoi-Vietname iha loron 2 fulan-maiu 2022 hodi partisipa iha eventu ne’e.

Notísia Relevante :Ekipa U-23 hahú treinu tátika foun kontra-atake adversáriu

Guarda rede prinsipál  husi ekipa selesaun nasionál Timor-Leste U-23, Junildo Manuel de Castro Pereira, hateten atu kompete ho fiar aan bainhira hasoru nasaun seluk, jogadór ne’e konsiente katak la’ós konfia de’it sira nia maneira joga no matenek ne’ebe maka jogadór ida-idak iha maibé persiza hetan apoiu moral husi povu Timor-Leste.

“Baliza ne’e importante hotu iha ekipa ida durante ne’e ha’u hanesan baliza prinsipal ou inti tanba ha’u nia prestasaun, maibé ha’u husu nafatin Timoroan sira nia tulun atu ami bele hatudu rezultadu di’ak,” nia hateten ba Tatoli, iha kuarta ne’e, iha Malázia.

Durante ne’e, maniak bola no povu Timor-Leste ema barak mak koiñese ona Junildo, bainhira kompete iha jogu nivel nasionál no internasionál maibé ema barak mós seidauk hatene ninia personalidade maihosi ne’ebe?.

Junildo moris iha Dili iha loron 04 fulan-juñu 2003, oan mane da-huluk hosi Agustinho da Costa no Ana Cicilia Guterres hosi maun alin na’in lima.

Jogadór otas nurak ne’e hahú nia estudu iha eskola bázika Anur Dili iha 2007-2012, eskola pre-sekundáriu 2013 to’o 2015 no eskola sekundariu iha Koléjiu Paulo VI Dili iha 2016 to’o 2018.

Junildo ninia esperénsia iha área futeból

Junildo envolve aan iha futeból hanesan guarda rede selesaun nasional U-12, iha tinan 2014 bainhira sei ho idade 14, maibe konsege partisipa kompetisaun futeból iha Korea Súl iha kompetisaun juvenile nian.

Nune’e iha 2016 jogadór ne’e nafatin ultrapasa ba selesaun nasionál U-14 konsege bá tuir kompetisaun iha Kambodia  iha jogu AFF nian.

Iha 2017 Junildo hakat ba selesaun nasionál U-16 hamutuk ho nia kolega sira iha pozisaun hanesan guarda rede nafatin konsege partisipa iha jogu internasionál AFF nian iha Tailandia.

No iha 2019 Junildo kompleta nia idade 19, no iha momentu ne’ebá,  treinadór Eduardo Pereira hili kedan nia hanesan guarda rede ba U-19 nian hodi bá partisipa jogu internasionál AFC nian iha Vietname.

Husi prestasaun lubuk ida ne’ebé nia hetan maka atrai kedas treinadór selesaun nasionál u-23, Fabio Maciel da Silva, nia laran hodi hili nia nu’udar guarda rede ba iha selesaun nasionál U-23.

Hamutuk iha selesaun U-23 Junildo ho nia kolega sira konsege bá partisipa ona eventu internasionál lubuk ida hanesan partisipa jogu AFC iha Singapura 2021, iha 2021 nafatin partisipa eventu Suzuki Cup iha Singapura hanesan baliza prinsipal to’o remata.

Iha 2022 Junildo hetan nafatin fiar hosi treinadór Fabio hodi tama iha guarda rede selesaun U-23 nian hodi bá joga iha kopa AFF ne’ebé hala’o iha Kambodia  iha ne’ebé Timor–Leste sai hetan terseiru lugar.

“Jogu mai ha’u la’ós ona buat foun, maibé hadi’a nafatin ha’u nia prestasaun atu bele sai baliza ne’ebé di’ak hodi salva bola bainhira joga iha kampu laran, tanba ne’e reprezenta RDTL tenke hatudu buat ne’ebé di’ak atu lakon ho dignidade manán mós ho dignidade,” nia dehan.

Tuir nia tama iha futeból la’ós ema ida mak obriga maibé tanba gosta bola ikus sai jogadór liu-liu espesifiku iha guarda rede.

Envolvimentu Junildo iha klube futeból

Reforsa iha selesaun nasionál U-23 hanesan guarda rede iha selesaun nasionál U-23,  Junildo mós hanesan guarda rede iha klube AD SLB Laulara, iha 2016  hodi partisipa Liga Futeból Amadora (LFA) hahú 2016 to’o 2018 no iha 2019 AS Ponta Leste presiza Junildo ba reforsa klube ne’e hanesan jogadór impresta temporariu de’it no la permanente iha Ponta Leste.

No iha 2020 Junildo fila hikas ba SLB hodi reforsa klube ne’e iha LFA, tasa 12 de Novembru no kopa FFTL no iha tinan 2021 hetan fali kontratu husi Assalam FC to’o ohin loron.

Notísia Relevante :Selesaun nasionál U-23 hahú hala’o treinamentu iha Malázia ba SEA Games

Jornalista: Hortencio Sanchez

Editór       : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here