Estudante Sekundária Sentru Aprendizajen Formasaun Eskolar Maliana, munisípiu Bobonaro, simu hela vasina Pfizer. Imajen Tatoli/Sérgio da Cruz.

BOBONARO, 28 abríl 2022 (TATOLI) – Estudante hosi eskola Sekundária Sentru Aprendizajen no Formasaun Eskolár (CAFE, sigla portugés) Maliana, munisípiu Bobonaro hosi idade tinan 12 to’o 17 hamutuk na’in-338 kompleta ona doze vasina Pfizer.

Koordenadora Eskola CAFE Maliana, Martinha Cejarinha da Costa Soares, informa antes ne’e iha loron 23 fulan-marsu totál estudante 300-resin aseitadu simu vasina doze dahuluk.

Hosi númeru estudante ne’e iha balun mak lakohi simu vasina tanba ina-aman seidauk aseita relasiona informasaun hoax katak vasina ne’ebé ema balu lansa iha mídia sosiál.

Notisia Relevante: Estudante CAFE Maliana 300-resin simu vasina Pfizer doze dahuluk

“Sira-ne’ebé iha primeiru doze lakohi simu, maibé graças a deus vasina tuir mai iha segunda doze sira mós bele simu hotu, ne’e mak totál estudante 338 mak kompleta ona vasina Pfizer,” nia informa ba Tatoli, iha salaun PDHJ Unidade Territoriál Bobonaro, kinta ne’e.

Responsável eskola ne’e haktuir, dezde rona informasaun katak Governu Timor-Leste hetan apoia vasina  Pfizer hosi nasaun seluk, parte eskola halo kedas koordenasaun ho parte servisu saúde munisípiu Bobonaro atu oferese vasina ba estudante sira.

Koordenadór eskola CAFE ne’e konsidera programa vasina ne’e iha progresu di’ak, tanba antes implementa pesoál saúde sira halo uluk advokasia ba manorin na’in sira, estudante hotu no inan-aman sira hafoin entrega karta konsentimentu nune’e bele foti desizaun ba oan sira simu vasina.

“Durante implementasaun programa ne’e estudante sira entusiazmu tebes simu vasina no inisiativa rasik hosi inan-aman sira tamba ne’e mak to’o ohin loron estudante hotu hetan ona vasina,” nia hateten.

Tuir dadus hosi Sentru saúde Maliana dezde implementasaun programa iha fulan-maiu to’o loron 27 fulan-abril, estudante sira simu vasina Pfizer iha postu administrativu ne’e doze dahuluk hamutuk na’in-4,827 no doze daruak ema na’in-797.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here