Atividade kapasitasaun pesoál administrasaun suku iha salaun administrasaun munisipál, kinta (28/04). Imajen Tatoli/Vitorino Lopes da Costa

VIQUEQUE, 28 abril 2022 (TATOLI)–Diresaun Estatístika munisípiu Viqueque, kinta ne’e, fó kapasitasaun ba pesoál administrasaun suku hamutuk na’in-36 kona-ba Refreshing Training Civil Registertion and Vital Statistic (CRVS).

“Ami halo kapasitasaun atu hafanun administrasaun suku sira tanba ita haree ba dadus populasaun kada suku ida-idak ne’ebé xefe suku sira fó ba ami ladún másimu. Tanba ne’e, ami realiza kapasitasaun hodi sira bele iha koñesimentu di’ak no halo loloos dadus,” Xefe Estatístika Viqueque, Maria Pascoela Fernandes Campos, hateten, ba Agência Tatoli, iha salaun administrasaun munisipál.

Notísia relevante: Setembru 2021, Governu hahú atualiza sensus populasaun no uma-kain 2015

Aleinde ne’e, liuhosi formasaun ne’e, partisipante sira bele eleva kualidade jere administrasaun suku no aumenta koñesimentu prienxe formuláriu CRVS ne’ebé Diresaun Estatístika sei distribui ba kada suku.

Tuir Responsável programa ne’e, dadus sira tenke aprezenta loloos tanba hosi estatístika bele fó impaktu ba baze dadus hotu.

“Ezemplu hanesan Programa Nasionál Dezenvolvimentu Suku (PNDS) sei utiliza dadus hosi tinan 2015, halo nusa maka bele halo kombinasaun ba populasaun mate no moris, nune’e bainhira xefe suku sira la fornese dadus populasaun moris, númeru aumenta populasaun bele fó impaktu ba baze dadus hodi lori dezenvolvimentu iha ita-nia munisípiu,” Maria akresenta.

Xefe Estatístika dehan, sensus uma-kain atualizadu kada tinan-lima dala-ida, ne’ebé labele halo analiza dadus populasaun ho kondisaun atuál.

“Ami presiza halo kombinasaun dadus sira ho dadus populasaun hosi tinan-lima nian, tanba ne’e ami presiza tebes dadus hosi xefe suku sira,” nia hato’o.

Biban ne’e, nia husu administrasaun apoiu suku sira tenki  iha boa vontade apreende atu prienxe formatu sira kona-ba rejista dadus populasaun iha kada suku.

Iha fatin hanesan, Reprezentante Administradór munisípiu Viqueque, Cosme Sarmento, konsidera kapasitasaun CRVS importante atubele kolabora ho munisípiu inklui liña ministeriál sira iha munisípiu Viqueque.

“Ita hamutuk ho Diresaun Estatístika munisípiu Viqueque fó kapasitasaun ba apoiu administrasaun suku sira oinsá maka bele kolleta dadus loloos, nune’e bele uza ba baze dadus iha munisípiu no uza iha Diresaun Estatístika,” nia tenik.

Tuir dadus sensu populasaun tinan 2015, munisípiu Viqueque iha populasaun hamutuk 90.639, kompostu hosi postu Lacluta 8.123, Ossu 23.926, Uatulari 22.243, Uatucarbau 8.987, Viqueque villa 27.360.

Entretantu, kapasitasaun CRVS ekipa hosi Diresaun Estatístika Viqueque durante loron-rua, hahú loron loron 28 to’o 29 abril.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here