Saudozu Eis Deputadu Kuarta Lejizlatura, Domingos Savio ‘Ki'ik Oan’. Imajen TATOLI/Natalino Belo.

BAUCAU, 28 abríl 2022 (TATOLI) – Eis Deputadu kuarta lejizlatura, Domingos Sávio Cabral Ribeiro “Ki’ik Oan” hakotu iis iha Hospital Rejionál Eduardo Ximenes (HoREX) Munisípiu Baucau tanba sofre moras pulmaun.

Celestina Gusmão Cabral nu’udar espoza esplika, matebian hahú sofre moras refere iha tinan 2020 ne’ebé hala’o tratamentu no hetan rekomendasaun hosi doutór espesialista sira iha Hospital Nacinal Guido Valadares (HNGV) atu kontinua hala’o tratamentu iha estranjeiru maibé adia tiha tanba relasiona ho kondisaun fíziku no pandemia Covid-19.

“Hafoin troka tiha (atu lori ba ospitál), ha’u observa nia iis ladún normál ona tuir dalan ho karreta, to’o iha ospitál nia iis kotu iha oras 04:00-resin, durante sofre moras, cairan iha pulmaun atu hasai, doutór sira halo atendimentu konjuntu planu atu ba li’ur maibé matebian rasik deside adia tiha tanba kondisaun ladún diak no pandemia covid-19,” Celestina Cabral hateten iha Vila Nova, kinta ne’e.

Matebian Domigos Sávio Cabral Pereira “Ki’ik Oan” moris iha 05 novembru 1967 iha postu administrativu Quelicai, munípiu Baucau. Matebian husik hela oan na’in-rua kompostu hosi feto-ida no mane-ida.

Saudozu ‘Ki’ik Oan’ partisipa iha luta libertasaun nasionál bainhira hala’oestudu iha Eskola Téknika Agríkola (ETA) Dom Bosco Foiloru, munisípiu Lautem no kontinua iha ensinu superiór UNTIM.

Bainhira Timor-Leste restaura nia independénsia kontribui iha prosesu konstrusaun estadu liuhosi halao kna’ar iha Ministériu Agrikultura no Peska iha tinan 2003 hanesan apoia polítika.

Eis Koordenadór Partidu Frente Revolusionáriu Timor-Leste Independente (FRETILIN) munisípiu Baucau ne’e asume mós kargu diretór agrikultura munisípiu Manatuto iha tinan 2014, kontinua diretór agrikultór iha Baucau to’o 2017.

Domingos Sávio eleitu nu’udar deputadu hosi bankada Frente Revolusionária Timor-Leste Independente (FRETILIN) reprezenta munisípiu Baucau iha Parlamentu Nasionál iha Kuarta Lejislatura iha loron 05 setembru 2017 no remata karreira nu’udar asesór tékniku iha Palásiu Prezidensiál.

Kona-ba prosesu fúnebre, parte família sei tuur hamutuk no koordena órgaun kompetente hanesan partidu FRETILIN no Parlamentu Nasionál hodi deside saudozu nia fatin deskansa ikus nian.

“Dalaruma kalan mak deside tanba maun-alin no institusaun partidu no estadu seidauk prezensa,” Celestina akresenta.

Saudozu Domingos Sávio nu’udar eis titulár órgaun soberania Parlamentu Nasionál, nune’e reprezentante povu sira iha uma fukun sei presta omenajen ikus ba nia kontribuisaun iha prosesu luta no ba kontribuisaun ba estadu, ne’ebé hatuur ona iha Rejimentu Parlamentu Nasionál no Estatutu ba Deputadu sira.

Maibé molok uma fukun presta omajenajen ikus, bankada parlamentár ka deputadu sira sei hatama proposta nune’e aprova vota pezár ba eis deputadu ne’e.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

1 KOMENTÁRIU

HAKEREK NO HATÁN

Please enter your comment!
Please enter your name here