Progresu projetu konstrusaun klínika TBC iha RAEOA. Imajen/Mídia RAEOA/ZEESM.

OÉ-CUSSE, 27 abríl 2022 (TATOLI) – Projetu klínika izolamentu ba moras Tuberkuloze (TBC), ne’ebé konstrui iha suku Nípani, sub-rejiaun Pante Makasar, Rejiaun Administrativa Espesiál Oé-Cusse Ambeno sei konklui iha fulan-juñu tinan ne’e tanba progresu fíziku atinje ona 60%.

Prezidente Autoridade RAEOA, Arsénio Paixão Bano, hateten, fasilidade foin dahuluk instala iha Oé-Cusse, hodi fó atendimentu dignu ba pasiente sira.

“Ha’u ho tékniku sira hosi Infraestrutura, hala’o fiskalizasaun ba projetu konstrusaun Klínika TBC ne’e nia serbisu tomak atinje ona 60%, obra ne’e kompleta kedas ho rezidénsia traballadór nian, tanba ita foin harii fasilidade ida-ne’ebé importante tebes ba povu Oé-Cusse bainhira halo tratamentu ba moras TBC ninian,” Arsénio Paixão Bano, hateten iha RAEOA, kuarta ne’e.

Nia espera projetu ne’e bele aselera hodi funsiona ba povu Oé-Cusse iha tinan ne’e, nune’e bele fasilita komunidade ne’ebe maka hetan moras TBC bele halo tratamentu, la presiza ba fatin dook ona.

Sekretáriu Rejionál ba Asuntu Saúde, Manuel da Costa, autoridade konstrui klínika izolalamentu ba moras Tuberculoze (TBC) atu separa atendimentu adekuada nune’e bele evita transmisaun hada’et iha sosiedade.

Objetivu hosi fasilidade ne’e atu fó garantia ba atendimentu saúde iha RAEOA tanba futuru Hospitál Referénsia Oé-Cusse, sei sai alternativa ida hodi fó satizfasaun ba komunidade no sosiedade.

“Autoridade nia intensaun, iha futuru pesoál saúde sira bele fó tratamentu adekuada ba komunidade, ne’ebé sofre moras TBC, nune’e bele asegura tratamentu no akompañamentu, ho fasilidade adekuadu, nune’e bele sente konfortável no rekupera hosi situasaun ne’e,” nia katak.

Projetu klínika izolamentu ba TBC ne’e ezekuta hosi empreza Tafen Kuan Unipesoál Lda, ho valór kontratu $154,551.69 ne’ebé aloka hosi Orsamentu Jerál Estadu (OJE) 2021.

Projetu klínika izolamentu TBC ne’e komposta hosi rezidénsia ba pesoál saúde nian, sala izolamentu ba pasiente TBC hamutuk sia (9), sala ba atendimentu, sala laboratóriu no sala ba farmásia kompleta ho moru, ho durasaun serbisu durante fulan-haat, hahú fevereiru to’o maiu 2022.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here