Pesoál Saúde hala’o hela atendementu ba pasiente moras dengue iha salaun emerjénsia HNGV. Imajen Tatoli/Antonio ‘Dasiparu’

DILI, 27 abríl 2022 (TATOLI)— Ministériu Saúde (MS) liuhosi Diresaun Nasionál Saúde Públika, Departamentu Vizilánsia Epidemolojia, relata   kazu dengue  agora hamutuk 4.480. Hosi númeru ne’e mate (óbitu) na’in-51 ne’ebé maioria labarik ki’ik.

“Situasaun kazu dengue iha Timor-Leste hosi janeiru too loron 27 abril 2022,  hamutuk kazu 4.480 no kumulativu óbitu na’in 51,” refere nota komunikadu ne’ebé Agência TATOLI asesu, kuarta ohin.

Kazu ne’e maioria deteta hosi munisípiu Dili ho totál 3.041, Baucau  296, Manatuto 173, Covalima 146, Ermera ho kazu 118, Manufahi 171,Viqueque 75, Ainaro 45, Liquiça 115, Aileu  87  no Bobonaro 54, Lautem 153, no RAEOA  neen.

Notísia relevante:   Surtu dengue: pasiente sa’e ba 4.174 no mate nain-50

Munisípiu Dili nafatin rejista kazu ne’ebe a’as iha primeira semana desimu sexto  fulan abril 2022, ho totál 3.041 kazu. Kazu sira ne’e kompostu husi postu administrativu Dom Alexo iha  1.779, Cristo-Rei 473, Vera-Cruz 322, no Nain Feto 383.

To’o ohin loron fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 517, Klínika Fatumeta 272, sentru saúde Comoro 1111, sentru saúde Vera-Cruz 226, sentru saúde Formoza 545, sentru saúde Becora 248, klinika madre eliza ida, sentru saúde Atauro  11,sentru saúde Metinaro 43 klínika Bairru-Pité 59, klínika Motael na’in-rua no klinika moris foun ida.

Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e, liman-ain no sikun moras hodi bele hetan atendimentu husi profisionál saúde sira.

Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dala ida.

Notísia relevante:   Pasiente dengue na’in-700 konsege rekuperadu iha Vera-Cruz

Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.

Jornalista : Felicidade Ximenes

Editóra   : Armandina Moniz

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here