iklan

BOBONARO, COVID-19, MUNISÍPIU, SAÚDE

Maria Vitoria sei anima komunidade Maliana

Maria Vitoria sei anima komunidade Maliana

Advogada ba labarik no foin-sa’e iha Timor-Leste, Maria Vitoria. Imajen António Gonçalves

BOBONARO, 27 abríl 2022 (TATOLI) Artista Maria Vitoria ‘Marvi’ sei anima komunidade iha merkadu Maliana, munisípiu Bobonaro.

Xefe Departamentu Programátiku Saúde Munisípiu Bobonaro, Paulina de Assunção Perreira Deneira, hateten iha sábadu semana ne’e artista famouza Maria Voitória (Marvi) sei anima komunidade sira-ne’ebé mai simu vasina iha merkadu Maliana, munisípiu Bobonaro.

Prezensa artista famouza ne’e fasilita hosi Ajénsia PARTISIPA hanesan meiu ida atu atrai komunidade sira simu vasina nune’e bele hasa’e taxa kobertura vasinasaun iha munisípiu Bobonaru ne’ebé sei menus.  Nune’e bele atinje meta ne’ebé governu define katak populasaun iha Timor-Leste 80% tenke simu hotu vasina hodi aumenta imunidade isin luta kontra pandemia Covid-19.

“Ita sei hetan animasaun hosi artista Maria Vitoria iha merkadu Maliana sábadu agora, atu nune’e komunidade hotu-hotu no funsionáriu ka instituisaun sira-ne’ebé seidauk hetan vasina kompletu no seidauk simu vasina atubele partisipa no aproveita haree animasaun hosi ita-nia artista ne’e,” nia informa ba jornalista sira, iha salaun administrasaun munisipál, kuarta ne’e.

Atu hasa’e kobertura vasinasaun iha munisípiu Bobonaro, daudaun ne’e Organizaun Naun Governamentál (ONG) lokál, internasionál no ajénsia sira iha hela terrenu halo advokasia, koordenasaun no mobilizasaun ba komunidade sira iha suku tarjetu ne’ebé ninia kobertura vasina seidauk atinje 80%.

Ekipa ne’ebé servisu hela iha terrenu mak hanesan Organizasaun Naun Governamental (ONG) lokál Hamutuk Nasaun Saudável (HAMNASA) foka liu iha postu administrativu Bobonaro, sentru saúde Kakanea kobre suku Lima no sentru súde Balibo iha suku ne’ebé besik fronteira hanesan, Cowa, Leohitu no Leo-lima.

Ajénsia PARTISIPA apoia iha postu administrativu Balibo, Bobonaro no Maliana. Enkuantu UNICEF kobre hotu sentru saúde hitu iha munisípiu Bobonaro, Word Vision mantein iha postu administrativu Maliana no Balibo. Parte Cruz Vermelha Timor-Leste mak apoia másimu iha postu administrativu Cailaco.

“Ami sente orgullu tanba governu la mesak, maibé ita hetan apoiu másimu hosi ita-nia ajénsia sira tanba halo ona mobilizasaun komunidade sira iha área intervensaun sira, ita garente katak ho serbisu hamutuk ne’e hatudu ona progresu di’ak, espera bele aselera lalais atinje persentajen ne’ebé ita hakarak,” Paulina afirma.

Antes ne’e Estadu Unida Amérika (EUA) liuhosi nia Ajénsia ba Dezenvolvimentu Internasionál (USAID) no implementa hosi Organizasaun Naun Governamental (ONG) lokál HAMNASA (Hamutuk Nasaun Saudável) no USAID nia atividade ba sustentabilidade ba saúde ajudika ona fundu ho montante $320,000 ba HAMNASA.

Entretantu rezultadu hosi kampaña vasinasaun durante ne’e servisu saúde munisípiu Bobonaro hamutuk ho ONG no ajénsia sira hatudu katak persentajen vasinasaun iha munisípiu ne’e doze dahuluk  83%, doze daruak 59,2%  no vasina Pfizer ba estudante iha postu administrativu Balibo mak atinje ona 100%.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!