DILI, 27 abríl 2022 (TATOLI)—Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares Pinto, informa konstrusaun Uma Kbiit Laek (UKL) 2022 hahú implementa no halo ona konstrusaun iha munisípiu Manufahi.
Notísia Relevante: Konstrusaun Uma Kbiit Laek 2021 atinje ona 91%
“Konstrusaun UKL ba tinan ne’e, Manufahi mak implementa ona tanba tama ona faze sia (9) nian katak fizikamente hahú ona konstrui uma,” Claudinha Soares Pinto hateten ba Agência TATOLI, iha nia knar fatin Colmera, Dili, kuarta ne’e.
Konstrusaun Uma Kbiit Laek 2021 iha munisípiu Manufahi finaliza ona, entaun PNDS hein de’it atu entrega ba benefisiáriu sira.
Miabé, nia informa, konstrusaun Uma Kbiit Laek 2022 iha munisípiu seluk nian ne’e, PNDS foin tama faze ualu (8) nian mak asina akordu projetu ho xefe suku no koordenadór munisípiu nian, depois mak ba faze sia hodi implementa konstrusaun nian.
Diretora ne’e hateten, kada etapa ne’e PNDS la’o tuir siklu ida pur ida no dala ruma etapa ida hala’o servisu ne’e to’o fulan ida.
“Tanba ne’e ita bele dehan ema haree ne’e fasil maibé ba ami ne’e difisil tebes, tanba lori tempu mak foin bele finaliza konstrusaun ne’e,” nia dehan.
Responsável ne’e hateten, agora uma kbiit laek ba ema 4.000 ne’e tékniku PNDS tenke tun ba iha terrenu lori metru sukat mak re-ajusta fali ho dezeñu uma ne’ebé PNDS prepara ona, dezeñu uma foun ida-ne’ebé ho nia kualidade di’ak tebes tanba ne’e presiza lori tempu mak bele konstrui.
Uma Kbiit Laek ba tinan ne’e, sei garante finaliza ho pursentu boot banhira tama ba 2023, signifika sei lori de’it pursentu kiik ba iha tinan oin.
Ba tinan 2022 ne’e, VIII Governu Konstitusionál aloka tan osan hamutuk millaun $71 hodi halo konstrusaun Uma Kbiit Laek (UKL) ba faze daruak nian no kada suku sei hetan uma 10 ezetu munisípiu Dili.
Notísia Relevante: Konstrusaun UKL 2021 iha Aileu-Liquiça-Manufahi konklui ona
Jornalista : Osória Marques
Editór : Cancio Ximenes
