Primeiru Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (27/04). Imajen Tatoli/Francisco Sony

DILI, 27 abril 2022 (TATOLI)–Governu liuhosi reuniaun Konsellu Ministru, kuarta ne’e, aprova ona pakote lejislativu ba área ambientál, ne’ebé kompostu hosi Projetu Dekretu-Lei haat, ne’ebé aprezenta hosi Sekretáriu Estadu Ambiente, Demétrio do Amaral de Carvalho.

“Projetu Dekretu-Lei dahuluk ne’ebé aprova ona, ninia objetivu atu kria Autoridade Nasionál Lisensiamentu Ambientál, Institutu Públiku (ANLA, I.P) no aprova ninia estatutu sira,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia relevante: SEA Emite Ona Lisensiamentu Ambientál 200-Resin ba Empreza Sira

ANLA sei iha misaun atu asegura implementasaun lejizlasaun kona-ba Lisensiamentu Ambientál, hodi sai responsável ba avaliasaun projetu, klasifikasaun, emisaun lisensa ambientál no monitorizasaun ba atividade entidade públika no privada ein jerál.

Nune’e, hosi proponente no titulár lisensa ambientál, sein prejuízu ba kompeténsia hosi Ministériu Petróleu no Minerál (PMP) rasik, Institutu Públiku ne’e sei tutela ba membru Governu ne’ebé responsável ba ezekusaun polítika iha área ambiente nian.

Enkuantu, projetu daruak ninia objetivu mak atu halo alterasaun dahuluk ba Dekretu-Lei númeru 5/2011, loron 09 fevereiru, ne’ebé refere ba Lisensiamentu Ambientál.

“Projetu ne’e mosu atu kompatibiliza rejime Jurídiku kona-ba Lisensiamentu Ambientál ne’ebé iha ona, ho kriasaun Autoridade Nasionál Lisensiamentu Ambientál inklui atu garante posibilidade atu aprezenta dokumentasaun relevante saida de’it iha ámbitu prosedimentu Lisensiamentu Ambientál iha nível lokál, tantu ba delegasaun ka reprezentasaun Autoridade Nasionál ne’e rasik ne’ebé sei bele harii ba oin,” Portavós Governu esplika.

Departementu governamentál ne’ebé responsável ba ezekusaun polítika sira iha área ambiente nian no ba ninia servisu deskonsentradu sira ho baze territoriál inklui ba entidade públika ka privada seluk saida de’it, ne’ebé sei estabelese kontratu ka parseria ho objetivu ida-ne’e.

Projetu Dekretu-Lei datoluk, ho objetu atu harii Autoridade Nasionál Dezignada (AND) ba Kombate Alterasaun Klímatika no atu aprova estatutu sira.

AND sei ezerse funsaun ba mekanizmu sira ne’ebé fó flexibilidade ba Protokolu Quioto, ho misaun atu aprova partisipasaun entidade nasionál públika no privada sira iha projetu sira iha kontestu dezenvolvimentu moos no iha komérsiu emisaun, ne’ebé autoridade ne’e sai hanesan interlokutór entre Repúblika Demokrátika Timor-Leste no Fundu Klimátiku Matak.

Projetu seluk ne’ebé aprezenta hosi Sekretáriu Estadu Ambiente, ninia objetivu atu halo alterasaun dahuluk ba Dekretu-Lei númeru 15/2019, loron 10 jullu, kona-ba Orgánika Sekretaria Estadu Ambiente.

“Liuhosi kriasaun Institutu Públiku, ne’ebé tutela ba Sekretaria Estadu Ambiente maka presiza atu halo ninia kompatibilidade ho autonomia téknika, administrativa, finanseira no patrimoniál ne’ebé institutu públiku sira-ne’e iha,” Ministru tenik.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here