Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Francisco Sony

DILI, 27 abril 2022 (TATOLI)–Governu husu timor-oan sira presiza hatene loloos informasaun molok foti desizaun atu ba serbisu iha rai-li’ur hanesan Portugal no nasaun seluk.

Ministru Prezidénsia Konsellu Ministru, Fidelis Manuel Leite Magalhães, haktuir, bainhira hala’o vizita ba Portugal no hasoru malu ho timor-oan diplomata no estudante, sira sempre hato’o preokupasaun kona-ba kondisaun balun ne’ebé sempre akontese.

“Sira hato’o preokupasaun barak no husu ha’u hato’o ba Governu, entaun ha’u lori mensajen ne’e hato’o ba Konsellu Ministru no Primeiru-Ministru, nune’e Governu bele foti medida hodi responde preokupasaun sira no ajuda rezolve problema hirak ne’ebé sira infrenta. Preokupasaun maka kona-ba estudu, presiza akompañamentu di’ak liután no preokupasaun boot maka timor-oan sira bainhira sai hosi rai-laran bá rai-li’ur, labele monu ba promesa sira ne’ebé atu ba serbisu, balun bá rai-li’ur, sira ba iha ne’ebá maibé seidauk iha akordu fixu entre ema ne’ebé haruka hosi Timór no hirak ne’ebé simu iha ne’ebá,” Ministru Prezidénsia Konsellu Ministru, Fidelis Manuel Leite Magalhães, relata iha Palásiu Governu, kuarta ne’e.

Notísia relevante: Incanto Group asina akordu traballadór ho ajénsia Jobs Global

Portavós Governu dehan, mosu problema tanba timor-oan barak bá to’o iha ne’ebá ema la tau-matan, tanba ne’e Governu sei halo koordenasaun para foti medida.

“Governu konsidera ne’e preokupasaun boot ida tanba ita lakohi Timor-Leste ema haree hanesan fali fonte ba tráfiku ema nian. Timor-oan sira sai hosi ne’e bá rai-li’ur atu serbisu, maibé to’o iha ne’ebá la serbisu no laiha oportunidade serbisu tanba laiha protesaun legál sira,” nia tenik.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here