Anizio Correia Avansadu selesaun nasional U-23. Imajen espesiál

MALAZIA, 27 abríl 2022 (TATOLI) – Jogadór talentozu hosi selesaun nasionál U-23, Anizio Correia (9) ho pozisaun avansadu sai ezemplár ba joven jogadór sira seluk katak atu sai futebolista ne´ebé di´ak tenke esforsu, dedikadu, badinas treinu no respeita regra sira.

Correia mós integra iha selesaun nasionál U-23 sei partisipa iha Sea Game hodi kontra Filipina, Vietnam, Myanmar no Indonézia, hahú iha dia 06 to´o 15 maiu 2022.

“Ha’u orgullu tebes sai hanesan selesaun nasionál bainhira treinadór bolu ha’u, kuandu ha´u tama iha ne’ebá, ha’u halo tuir regra saida mak iha tanba iha selesaun ne’e la´os atu naran tama de’it, maibé tenke iha duni prestasaun mak bele tama”, Jogadór talentozu, Anizio Correia ba Agência TATOLI, iha Malazia, kuarta ne’e.

Uainhira Correia sai jogador selesionadu atu joga iha nível internasionál, nia sente orgullu tanba bele lori Timor-Leste atu kompete jogu futebol iha rai-liur.

“Hosi kiik kedan ha’u gosta tebe bola, ikus ha’u sai duni jogador ne’e la´os ema ida mak motiva ha’u maibe ha’u nia hakarak rasik”, haktuir.

“Bainhira ha´u partisipa dahuluk iha jogu AFC nian iha Singapura, ha’u sente orgullu tebes, tuir fali iha jogu Suzuki Cup, ikus iha jogu AFF nian, ita konsege hetan terseiru lugar, ida ne’e orgullu liu ba ha’u hanesan jogadór no timoroan ida”, refere.

Anizio moris iha Kaitehu Postu Administrativu Bazartete, Munisipiu Liquiça, nia moris iha dia 23 maiu 2003, oan hosi Silvestre Correia no Matilda Soares de Fatima. Anizio hanesan oan mane dahuluk hosi maun alin na’in neen.

Anizio komesa nia estudu iha 2007 iha eskola primaria Kaitehu remata iha 2012 no komesa eskola pre-sekundáriu iha 2013-2015 iha eskola Bogoro Liquiça no kontinua kedan ensinu sekundáriu iha 2016-2018 iha eskola Bogoro Liquiça.

Hahú tama mundu futebol

“Ha’u tama iha futeból duranta sei kiik kedan iha 2018 ba kraik ha’u joga iha ha’u nia Aldeia Kaitehu Munisipiu Liquiça, depois mai klube mak tama to´o iha selesaun nasionál”, nia konta.

Anizio hahú joga hanesan jogadór iha klube segunda divizaun FC Lero iha 2019, maibé iha tempu ne’ebá Lero falla ultrapasa ba primeira divizaun no monu ba terseira divizaun jogadór ne’e deside sai hosi FC Lero.

Tanba nia hatudu prestasaun di’ak no prodúz golu barak durante joga iha Lero, halo treinadór klube primeira divizaun AS Ponta Leste, Eduardo Pereira komesa tau-matan no dada nia ba joga hamutuk iha Ponta Leste hanesan avansadu rezerva.

Nune’e iha 2020 prestasaun Anizio nian komesa di’ak liu ona treinadór ne’e komesa haraik konfiansa barak ba nia muda nia pozisaun hanesan avansadu prinsipál ne’ebé konsege prodúz mós golu barak durante jogu Kopa FFTL, maske lori de´it Ponta Leste to´o oitavu finál

Antes tama too oitavu finál jogadór Liquiça oan ne’e hamutuk ho nia kolega sira konsege tebe sai klube sira hanesan Atletico Ultramar, AS Marca no Lica-Lica Lemorai.

Iha Oitavu finál sira konsege hasoru Assalam FC maibé labele hetan vitória tanba derrota ho golu úniku 0-1.

Ho prestasaun sira ne’e dada liutan atensaun treinadór selesaun nasionál Fabio Maciel da Silva hodi bolu Anizio ba treinu hamutuk iha selesaun nasionál U-23 no seniór, maibé iha 2019 jogadór ne’e mós tama ina hanesan jogadór selesaun U-19.

Jornalista: Hortencio Sanchez

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here