Diretór Servisu BTL, E.P Viqueque, Marito da Costa. Imajen Tatoli/Vitorino Lopes da Costa

VIQUEQUE, 27 abril 2022 (TATOLI)–Diretór Servisu Bee Timor-Leste, Empreza Públika (BTL, E.P) Viqueque, Marito da Costa, lamenta tanba ema deskoñesidu taka bee-matan iha Luihunu, postu Ossu, munisípiu Viqueque,ne’ebé kondisaun ne’e difikulta konsumidór sira  asesu ba bee-moos.

“Ha’u atu informa ba konsumidór sira katak agora ita-nia bee ne’ebé mai hosi rekursu bee-matan Luihunu, horikalan maizumenus tuku 22:00, iha ema deskoñesidu taka bee ho nuu fuan rua inklui fatuk ba kanu laran. Nune’e ohin madrugada ha’u orienta ekipa téknika hodi observa direta ba bee-matan hodi hasai foer sira,” Diretór informa ba Agência Tatoli, iha ninia knaar fatin, Beloi, kuarta ne’e.

Notísia relevante: Problema falta bee-moos sai empedimentu dezenvolve saneamentu báziku iha Viqueque

Marito dehan, aktu ema deskoñesidu ne’ebé taka bee-matan konsidera hanesan krime tanba prejudika ema barak nia atividade.

“Sorte taka ho nuu fuan no fatuk, maibé kuandu tau ai-moruk ruma, ema barak bele iha problema ho saúde. Tanba ne’e, ha’u husu ba públiku, liuliu komunidade ne’ebé hela besik iha rekursu bee-matan Luihunu hodi tau-matan ba bee. Karik grupu ruma tama-sai iha área bee-matan, tenke informa lalais ba autoridade suku no parte seguransa,” nia apela.

Tuir Diretór ne’e, bee fó moris ba ema, tanba ne’e ema hotu tenki tau-matan hamutuk ba rekursu bee.

“Konsumidór bee-matan Luihunu to’o Viqueqeu Vila purvolta 11.000. Labele tau fiar ba parte BTL, E.P de’it, maibé mós parte seguransa inklui komunidade. Ema deskoñesidu ne’ebé taka bee-matan ne’e ha’u informa ona ba Komadante Polísia Nasionál Timor Leste (PNTL) hodi orienta membru sira hamutuk ho tékniku sira iha terrenu hodi hadi’a kanu atu komunidade bele asesu fali bee,” nia salienta.

Kazu taka bee-matan ne’e akontese bebeik ona, maibé tékniku sira esforsu hamoos hodi bee sai filafali.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here